Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 163 Hüküm no: 255 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâce Hatun mahallesinde Berber Mustafa’nın kardeşi Mehmed’le ortak olduğu dükkâna yaptığı masrafı yirmi üç sene sonra vârislerinden tahsil etme talebinin uygun görülmediği Ma‘rûz, Üsküdar’da Hâce Hatun mahallesinden Berber Mustafa karındaşı müteveffâ Mehmed’in evlâdları taraflarından vekîl-i şer‘îsi diğer Emetullah ile mürâfa‘a-i şer‘ oldukta on iki hisse i‘tibâriyle sekiz hissesi benim ve dört hissesi karındaşım müteveffâ-yı mezbûrdan müntakil bir bâb berber dükkânı târih-i i‘lâmdan yirmi üç sene mukaddem bi’l-külliye muhterik oldukta karındaşım mezbûrun hayatında ben dükkân-ı merkūma dört yüz yirmi guruş harc u sarf edip karındaşım müteveffâ-yı mezbûrun hayatında on yedi sene sükût edip da‘vâya tesâddî etmeyip vefât eyledi dahi altı sene olmağla ben mezbûrânın ammileri olup terekelerini taksîm ettirmişdim ve kızları mezbûretânın hisselerini teslîm edip ol vakitte dahi sükût eyledim ba‘zı da‘vâya tesâddî eylemeleriyle ben dahi kızları mezbûretânın terekesine vaz‘-ı yed ettikleri ecilden masrûfum olan meblağ-ı mezkûrdan sehimlerine iktizâ edeni taleb ederim deyü ba‘de’d-da‘vâ ve’l-inkâr husûs-ı merkūm yirmi üç sene mürûr edip bilâ-özr sükût etmekle on beş [yıl] bilâ-özr terk olunan da‘vânın istimâ‘ı bilâ-emr memnû‘âttan olmağla vekîl-i mezbûreye suâl dahi teveccüh etmeyip müdde‘î-i mezbûr Berber Mustafa bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî-gurreti Safer sene 1155