Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 360 Hüküm no: 363 Orijinal metin no: [82a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musazâde Mehmed Efendi’nin çocukları Fâtıma ve Ümmügülsüm’ün vâlidelerine olan borçlarına takas olmak üzere evlerini sattıkları Husûs-ı âti’l-beyânın mahallinde ketb ü tahrîri iltimâs olunmağın bu fakīr bizzât mahmiye-i İstanbul’da Gülcâmi‘ Mahallesi’nde Musazâde Mehmed Efendi’nin kerîmeleri Fâtıma ve Ümmügülsüm nâm hatunların menzillerinde vâki‘ fevkānî odaya varıp zeyl-i kitâbda mastûrü’l-esâmî olan Müslimîn huzûrunda akd-i meclis-i şer‘-i nebevî eyledikde mezbûretân Fâtıma ve Ümmügülsüm nâm hatunların zâtları mahalle-i mezbûrede sâkin Berber İbrahim Çelebi b. Ali ile Attâr İbrahim Ağa b. İvaz nâm kimesneler ta‘rîfleriyle mu‘arrefe oldukdan sonra meclis-i ma‘kūd-ı mezkûrda vâlideleri işbu râfi‘u’l-kitâb Kerime Hatun bt. Abdullah nâm hatun mahzarında her biri ikrâr-ı tâm ve takrîr-i kelâm edip akd-i âti’z-zikrin sudûruna değin ber-vech-i iştirâki’s-seviyy bir ferde mülkümüz ve hakkımız olup mahalle-i mezbûrede vâki‘ bir tarafdan Kara Abdi menzili ve bir tarafdan İsmail Efendi Sirkeci Vakfı menzili ve bir tarafdan tarîk-i hâs ve bir tarafdan tarîk-i âm ile mahdûd fevkānî bir köşk ve bir tahta-pûş ve vustâda dört bâb oda ve bir su kuyusu ve bir kenîfi müştemil mülk menzilimizi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i kat‘î ile vâlidemiz mezbûre Kerime Hatun’a beş yüz elli guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabz eyledikden sonra semeni olan meblağ-ı mezbûr beş yüz elli guruşu vâlidemiz mezbûre Kerime Hatun’a ikimizin zimmetinde cihet-i karzdan reddi lâzım beş yüz elli guruş deynimize takās ol dahi ber-vech-i meşrûh mukāssa ve kabûl edip fîmâ-ba‘d menzil-i mahdûd-ı mezkûr cemî‘ müştemilâtıyla vâlidemiz mezbûre Kerime Hatun’un mülk-i müşterâsı olmuşdur bizim kat‘â alâka ve medhalimiz kalmayıp keyfe mâ teşâ ve tahtâr mutasarrıfe olsun dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ aşer min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mustafa Çelebi b. İbrahim, Berber İbrahim Çelebi b. Ali, Hüseyin Çelebi b. Ali, Attâr İbrahim Ağa b. İvaz, Ali Çelebi b. Şa‘ban el-hayyât, Mustafa Çelebi b. Abdülaziz, Yorgancı Molla Ebûbekir Çelebi b. Mahmud, Hüseyin b. Ahmed.