Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 167 Hüküm no: 262 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuzguncuk’taki tarlanın Abdullah Ağa Vakfı adına zapt edilmesi Ma‘rûz, Vâki‘ olan mevâddı istimâ‘ için kıbel-i şer‘den me’zûnen irsâl olunan Mevlânâ Mehmed Emin Efendi dâ‘îleri Üsküdar’a tâbi‘ Kuzguncuk karyesine varıp akd-i meclis-i şer‘i âlî ettikte karye-i mezbûrede sâkine Raki Nasrâniyenin tarafından vekîl-i sâbitü’l-vekâlesi zevci Yani zimmî ma‘kūd meclis-i şer‘de karye-i mezbûre Subaşısı İsmail ile ba‘de’t-terâfu‘ karye-i mezbûre hâricinde merhûm Abdullah Ağa Vakfı toprağında vâki‘ etrâf-ı erba‘adan merhûm Güğümbaşı? veresesi ve Kuyumcu Abdullah bağları ve Kıblelizâde tarlası ve tarîk-i âm ile mahdûd tahmînen on beş dönüm bir kıt‘a tarla müvekkilem mezbûrenin hakk-ı müfevvezi iken tarla-i mezkûr vakfa mahlûl olmak zu‘muyla bi-gayr-ı hakkın zabt murâd eder deyü da‘vâ ettikte gıbbe’s-suâl subaşı merkūm cevâbında fi’l-vâki‘ tarla-i mezkûrun sahib-i ma‘rûfu olmamağla kānûn-ı kadîm üzere vakfa mahlûl âid olduğuna binâen vaz‘-ı yedini ikrâr lâkin ber-vech-i muharrer müdde‘âsını inkâr edicek, vekîl-i mezbûr müdde‘âsını beyân için bi’d-defa‘ât şâhide havâle ve mehl-i şer‘î ile imhâl olunup ityân-ı beyyine etmemekle vekîl-i mezbûr bilâ-beyyine bî-vech mu‘ârazadan men‘ ve tarla-i mezkûru vakfa zabteylemek üzere merkūm Subaşı İsmail’e tenbîh olunduğu mezbûr dâ‘îleri mahâllinde tahrîr, ba‘dehû ümenâ-i şer‘le meclis-i şer‘a gelip alâ-vukū‘ihî inhâ ve takrîr ettikleri bi’l-iltimâs huzûr-ı âlîlerine i‘lâm olundu. Fî 3 Saferü’l-hayr sene 1155