Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 168 Hüküm no: 265 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âmine bt. Mustafa’ya ait Kadıköy’deki mülk menzile müdahale edilmemesi Ma‘rûz, Vâki‘ olan mevâddı istimâ‘ için kıbel-i şer‘den me’zûnen irsâl olunan Mevlânâ Mehmed Emin Efendi dâ‘îleri Üsküdar’a tâbi‘ Kādı karyesine varıp akd-i meclis-i şer‘-i şerîf ettikte karye-i mezbûrede subaşı ve beytü’l-mâl kabzına me’mûr el-Hâc Hasan meclis-i ma‘kūd-ı mezkûrda karye-i mezbûrede zikri câ’î menzile vaz‘-ı yedi mütehakkık olan İstanbul’da Uzun Şücâ‘ mahallesinde sâkine Âmine bt. Mustafa Efendi nâm hatun tarafından vekîl-i sâbitü’l-vekâlesi el-Hâc Ömer ile ba‘de’t-terâfu‘ müvekkile-i mezbûrenin zevci olup bundan akdem mahalle-i mezbûrede fevt olan Mustafa Ağa nâm kimesnenin zâhirde zevcesi mezbûreden gayrı vâris-i ma‘rûfu olmayıp terekesinin rub‘u zevce-i mezbûreye ve selâse-i erbâ‘ı cânib-i beytü’l-mâla munhasıra olmağın müteveffâ-yı mezbûrun terekesinden karye-i mezbûrede vâki‘ lede’l-ahâlî ma‘lûmü’l-hudûd ve’l-müştemilât bir bâb mülk menzilin selâse-i erbâ‘ı beytü’l-mâla âid olmuş idi, teslîme tenbîh olunmak bi’l-emâne murâdımdır dedikte gıbbe’s-suâl vekîl-i mezbûr cevâbında bin yüz yirmi üç senesi târihiyle müverrah işbu mülknâme hücceti mantûkınca ilâ-hâzihi’l-vakt menzil-i mezkûr müvekkilemin yedinde müstakillen mülkü olup hatta zevci müteveffâ-yı mezbûr Mustafa Ağa hâl-i hayatında menzil-i mezbûrda vechen mine’l-vücûh alâka ve medhali olmayıp zevcesi mezbûrenin mülkü olduğunu şuhûd mahzarlarında ikrâr ve işhâd eylemiştir deyü ba‘de’d-def‘ ve’l-inkâr vekîl-i mezbûr def‘-i meşrûhunu lede’t-tezkiye adâletleri zâhir olup karye-i mezbûre sükkânından ve hüccet-i mezkûre zeylinde mastûrü’l-isim el-Hâc Sinan b. Murtaza ile ve Mehmed b. Veli ve Mustafa b. Ahmed nâm kimesneler şehâdetleriyle vech-i şer‘î üzere isbât etmeğin mûcebince subaşı-i merkūm bî-vech mu‘ârazadan men‘ olunduğunu mezbûr dâ‘îleri mahâllinde tahrîr ba‘dehû ümenâ-i şer‘le meclis-i şer‘a gelip alâ-vukū‘ihî inhâ ve ihbâr ettikleri bi’l-iltimâs huzûr-ı âlîlerine i‘lâm olundu. Fî 3 Saferü’l-hayr sene 1155