Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 361 Hüküm no: 364 Orijinal metin no: [82a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi’nin vakfa ait yanan evi yeniden inşa etmesiyle yapılan masrafın keşfi Mahmiye-i İstanbul’da Debbâğzâde Mahallesi sükkânından olup zikri câ’î menzile kıbel-i şer‘den mütevellî ta‘yîn olunan sâhibü hâze’l-kitâb fahrü’l-kuzât Ahmed Efendi b. Hüseyin Efendi meclis-i şer‘-i hatîr-i lâzımü’t-tevkīrde takrîr-i kelâm ve bast ani’l-merâm edip mahalle-i mezbûrede vâki‘ bir tarafdan müteveffâ el-Hâcı Mehmed’in oğlu Hüseyin ile zevcesi Belkıs Hatun menzilleri ve bir tarafdan el-Hâc Ali nâm müteveffânın kızı Âişe Hatun menzili ve iki tarafdan tarîk-i âm ile mahdûd ber-mûceb-i hüccet-i şer‘iyye binâsına mülkiyet üzere mutasarrıf olduğum menzili ashâb-ı hayrâtdan merhûme Fâtıma bt. Ca‘fer nâm hatun beher yevm rûhi’çün bir sûre-i Yâsîn-i şerîf tilâveti mukābelesinde bir recül-i sâlihe şart edip bin yüz kırk iki senesinde vâki‘ olan harîkde bi-emri’llâhi te‘âlâ menzil-i merkūm [82b] bi’l-külliye muhterik olup arsa-yı sırfa kalmağla kendi mâlım ile mülküm olmak üzere nefsimi’çün bi’l-izni’ş-şer‘î müceddeden binâ ve işhâd eyledim dâhiliye ve hâriciyyesinde tabaka-i ulyâda iki bâb sâde oda ve bir sofa ve dehlîz ve vustâda bir sâde oda ve kilâr ve iki abdesthâne ve bir dehlîz ve tahtânî bir kârgîr ocaklı matbah ve bir mağsel ve bir ahır ve bir samanhâne ve üç kenîfi müştemil mülk menzilimin hâlâ kıbel-i şer‘den üzerine varılıp masrûfum keşif ve takvîm olunmak matlûbumdur dedikde cânib-i şer‘-i şerîfden irsâl olunan keşif nâibi Mehmed Abdullah Efendi hâssa mi‘mârlarından el-Hâcı Mustafa b. Ali halîfe ile zikrolunan menzile varıp zeyl-i vesîkada muharrerü’l-esâmî Müslimîn ile nazar ve mi‘mâr-ı mezbûr ebniye-i mezkûreyi mesâha ve takvîm ettikde sakf-ı vâhid tahtında olan ebniyesi tûlen on beş zirâ‘ ve arzen sekiz buçuk zirâ‘ bi-hesâb-ı terbî‘i yüz yirmi yedi buçuk zirâ‘ ebniyenin beher zirâ‘ı mecmû‘ tetimmâtıyla altışar yüz akçeden yetmiş altı bin beş yüz akçe ve tahtânî tûlen on bir buçuk zirâ‘ ve arzen altı zirâ‘ bi-hesâb-ı mezbûr doksan altı zirâ‘ matbahın beher zirâ‘ı seksen akçeden beş bin beş yüz yirmi akçe ve matbah-ı mezbûrun kârgîr ocağ[ı] ber-vech-i tahmîn yedi bin iki yüz akçe ve üç aded taş duvar tûlen yirmi dokuz ve arzen altı zirâ‘ bi-hesâb-ı mezbûr yüz yetmiş dört zirâ‘ beher zirâ‘ı altmışar akçeden on bin dört yüz kırk akçe ve zikrolunan duvar üstünde tûlen on üç zirâ‘ ve arzen iki zirâ‘ bi-hesâb-ı mezbûr yirmi altı zirâ‘ tahta perde beher zirâ‘ı <> kırkar akçeden bin kırk akçe ve cedîd kaldırım tûlen sekiz zirâ‘ ve arzen altı zirâ‘ bi-hesâb-ı mezbûr kırk sekiz zirâ‘ beher zirâ‘ı on ikişer akçeden beş yüz yetmiş altı akçe ki min-haysu’l-mecmû‘ bir yük bin iki yüz yetmiş altı akçe ile ancak olur deyü mi‘mâr-ı mezbûr haber ve cemâ‘at-i Müslimînin icmâ‘ ve ittifâklarını nâib-i mezbûr mahallinde tahrîr ba‘dehû ma‘an ba‘s olunan Mustafa b. Mehmed ve Mehmed b. Abdullah ile meclis-i şer‘de takrîr etmeğin mâ-hüve’l-vâki‘ bi’t-taleb ketb olundu. Bâ-imzâ-i hazret-i efendi. Tahrîr fi’l-yevmi’l-âşir min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Fahrü’l-kuzât el-Hâc Mehmed Efendi b. Abdullah, Mustafa Efendi b. Ali, el-Hâc Osman b. Mustafa, Mustafa Ağa b. Veliyüddin, Veliyüddin Efendi b. Ali müezzin, Hâfız Ahmed b. el-Hâc Osman, Mehmed Çelebi b. Mehmed, Mustafa Ağa b. İbrahim, Mustafa Beşe b. Abdullah, diğer Mustafa Beşe b. Abdullah, Bakkāl İbrahim Beşe b. Abdurrahman.