Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 170 Hüküm no: 269 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim’in Çinili Camii yakında ikamet eden Yuvan v. Stepan’ı yaraladığı Ma‘rûz, Üsküdar’da Çinili Câmi‘-i şerîf kurbünde sâkin bağçevân tâifesinden olup ber-vech-i âtî mecrûh idiği kıbel-i şer‘den ba‘de’l-keşf ve’l-mu‘âyene nümâyân olan Yuvan v. Estepan nâm zimmînin tarafından vekîl-i sâbitü’l-vekâlesi Hâfız Mehmed Efendi meclis-i şer‘de müvekkil-i mezbûrun hasmı medîne-i mezbûrede Atîk Vâlide Sultan hudûdu dâhilinde subaşı neferâtından Bostânî İbrahim b. Ahmed mahzarında mezbûr İbrahim târih-i i‘lâm gecesi vakt-i mağribde câmi‘-i mezbûr önünde sûkda mezbûr Yuvan’ı başının sol cânibi tepesi üzerine sopa ile darb ve cerh ve yine sağ arkasının küreği ardından darb kara bere, bu vechile bi-gayr-ı hakkın müvekkile-i mezbûru darb ve kara bere etmiştir deyü mûcebini bi’l-vekâle da‘vâ ve mezbûr İbrahim cevâbında vakt-i mezbûrda karındaşını ihzâr edersen önüne gelip karındaşını yedimden tahlîs ve ol hînde ben dahi sopa ile ancak arkasına darb başının üzerinde olan darbını bi’l-külliye inkâr etmekle müdde‘î vekîl-i mezbûr vech-i muharrer üzere müdde‘âsını lede’t-tezkiye adâletleri zâhir olup câmi‘-i mezkûr kurbünde sâkin el-Hâc Hüseyin b. Mehmed ve Ahmed b. Mahmud nâm kimesneler şehâdetleri ile muvâcehesinde vech-i şer‘î üzere isbât etmeğin mûceb-i şer‘îsi cerh-i mezkûrun bur’una tevkīf olunduğu bi’l-iltimâs huzûr-ı âlîlerine i‘lâm olundu. Fî 10 Saferü’l-hayr sene 1155