Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 362 Hüküm no: 365 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi ve kardeşi Fâtıma’nın babalarından intikal eden Acem asıllı Fâtıma’yı azat ettikleri Mahmiye-i İstanbul’da Kaptan Sinan Mahallesi’nde sâkin iken bundan akdem vefât eden Ali Çelebi b. Abdullah b. Abdurrahman’ın verâseti sulbî kebîr oğlu Mustafa Çelebi ve sulbiye kebîre kızı Fâtıma <> Hatun’a münhasıra oldukdan sonra mezbûr Mustafa Çelebi asâleten ve mezbûre Fâtıma Hatun tarafından dahi ıtk-ı âti’l-beyânı ikrâra vekîl olduğu zât-ı mezbûreyi ma‘rifet-i şer‘iyye ile ârifân Mehmed Çelebi b. Süleyman ve Halil Çelebi b. İbrahim nâm kimesne şehâdetleriyle sâbit olan İbrahim Çelebi b. el-Hâc Hüseyin nâm kimesne vekâleten meclis-i şer‘-i şerîf-i enverde müteveffâ-i mezbûrun hayâtında yedinde câriye-i memlûkesi olup ba‘de’l-vefât bana ve müvekkile-i mezbûre Fâtıma Hatun’a mevrûse olan işbu uzun boylu, kara gözlü, çatık kaşlı Acemiyyetü’l-asl Müslimetü’l-mille sâhibetü hâzihi’l-vesîka Emine bt. Abdullah mahzarında her biri bi’l-asâle ve bi’l-vekâle ikrâr-ı tâm ve takrîr-i kelâm edip ıtk-ı rakabât a‘zam[-ı kurebât ve] ref‘-i derecât ve vesîle-i duhûl-i cennât-ı âliyât olduğuna her birimiz âlim ve hâzim olduğumuza binâen mevsûfe-i mezbûre Emine’yi hasbeten lillâhi te‘âlâ i‘tâk ve tahrîr ve kayd-ı rıkkıyetden ıtlâk ve harâir-i asliyyât zümresine idrâc ve ilhâk eyledik fîmâ-ba‘d mevsûfe-i mezbûre sâir harâir-i asliyyât gibi hürre olup üzerinde velâdan gayrı alâkamız kalmadı dediklerinde mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Ahmed, Kādızâde İbrahim Çelebi, Abdullah Çelebi b. Mehmed, mahalle imâmı Ahmed Efendi b. Şeyh Şucâ‘, Müezzin Mehmed Halîfe b. İbrahim, Solak Mustafa b. el-Hâc Mehmed, Berber Mehmed Çelebi b. ( ).