Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 363 Hüküm no: 366 Orijinal metin no: [83a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eyüp Mahkemesi kethüdası İsmail Ağa’nın hizmetinde bulunan Mustafa b. el-Hâc Mehmed’in zimmetini ibra ettiği Hazret-i Ebî Eyyüb Ensârî Mahkemesi’nde kethüdâlık hizmetinde olan fahrü’l-akrân İsmail Ağa b. Ali nâm kimesne meclis-i şer‘-i hatîr-i lâzımü’t-tevkīrde kendinin dört aydan berü hizmetinde olup hâlâ Eyüp’te İsmihanî Sultan Medresesi’nde sâkin işbu sâhibü’l-kitâb Mustafa b. el-Hâc Mehmed mahzarında ikrâr ve takrîr-i kelâm edip mezbûr Mustafa benden bundan akdem kırk guruş istikrâz ve kabz edip mukābelesinde eşyâ-i memlûkesinden bir al kutnî kaftan ve bir Hindî kutnî beyâz kaftan ve bir hâre kaftan ve bir carşal kuşak ve bir sof biniş ve bir kürk ve bir biniş cam rengi çuka biniş ve bir sa‘ati bana rehin etmişidi el-hâletü hâzihî kırk guruşu merkūm Mustafa yedinden meclis-i şer‘de tamamen ahz u kabz eyledim meblağ-ı mezbûr mukābelesinde yedimde mazbût olan eşyâ-i mezkûresini kezâlik meclis-i şer‘de tamamen def‘ ve teslîm ol dahi ahz ettikden sonra hizmetimde iken beş-i tahiyyebden [piştahtamdan] otuz dokuz guruşluk ecnâs akçemi hufyeten ahz u kabz etmişidin deyü da‘vâ ve merkūm Mustafa dahi inkâr ve yemîn dahi etmekle el-hâletü hâzihî birbirimiz zimmetinde kalîl ü kesîr ma‘lûme ve mechûleye müte‘allik vechen mine’l-vücûh hak ve müstehakkımız kalmayıp birbirimizin zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ aşer min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mustafa Efendi b. Ahmed, Tahtacı Mehmed Ağa, Kādızâde İbrahim Çelebi, Abdullah Çelebi b. Mustafa, Mehmed b. İbrahim, İsmail Çavuş Ağa b. Mehmed, Mustafa Çelebi b. Ahmed.