Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 182 Hüküm no: 296 Orijinal metin no: [50a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Namahrem bir kadını alıkoyan Mehmed’in kalebend edilmesi Ma‘rûz Sahib-i arzuhâl hasmı olup bundan akdem Üsküdar kolluğu çorbacısı ma‘rifetiyle ahz ve ihzâr-ı şer‘ etdirdiği el-Hâc Mehmed muvâcehesinde mezbûr el-Hâc Mehmed babam Halil ve vâlidem Âişe ile Erzurum’dan çıkarıp Tokad’a geldikde hâlâ babam telef ve zâyi‘ ve mâlımızdan iki re’s bargir ve bir merkebimizi ahz ve vâlidem Âişe kendüye nâ-mahrem iken kendi takrîri üzere Gerede nâm mahâlde altı ay meks ve ba‘dehû İznik’de iki ay mikdârı meks ve mahremiyet eylemişdir deyü da‘vâ ol dahi mezbûretân kendüye nâ-mahrem iken sekiz ay mikdarı gezdirdiğin ikrâr zikrolunan bargirler ile merkebi inkâr etmekle mezbûre Âmine isbât sadedinde iken anası mezbûre kendüye niyâz etmekle da‘vâsından fâriğa olup lâkin mezbûr el-Hâc Mehmed ikrârı üzere müttehem ve tedîbe muhtâc olmağla sâirlere nush ve hilâf-ı şer‘-i şerîf nâ-mahrem avrat ile bu kadar eyyâm gezmek ile ıslâh-ı nefs edince kılâ‘-ı sultâniyeden birinde kalebend olmak bâbında fermân-ı âlî ricâsıyla huzûr-ı âlîlerine i‘lâm olundu. Fî 29 Rebî‘ülevvel sene 1155