Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 189 Hüküm no: 313 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’da misafir olarak bulunan Şeyh Kalender Belhi’nin çalınan at ve eşyasının kendisine teslim edilmesi İ‘lâmı mûcibince amel olunmak buyruldu. Ma‘rûz Üsküdar’da müsâfiren sâkin eş-Şeyh es-Seyyid Kalender Belhî dâ‘îleri hancı tâifesinden el-Hâc İbrahim ile mürâfa‘a-i şer‘-i şerîf olduklarında hâlâ hancı-ı mezbûrun yedinde ber-vech-i âtî vedî‘a olduğu tarafeynin ikrâr ve tasdîkıyle şer‘an müte‘ayyen olan bir re’s kır bargir ve bir re’s doru bargir ile bir aba yağmurluk ve bir mikdâr eşyâ-yı ma‘lûme mezbûr es-Seyyid Kalender’in mülkü iken târih-i i‘lâmdan dört gün mukaddem hizmetkârı Ali nâm kimesne müsâfiren olduğu Nerdübânlı tekkesinde hufyeten ahz ve hancı-ı mezbûra îdâ‘ edip firâr etmeğin hâlâ zikrolunan iki re’s bargir ve eşyâ-yı ma‘lûme mezbûr es-Seyyid Kalender’in mâlı ve mülkü olduğu es-Seyyid Mustafa ve Ahmed Beşe nâm kimesnelerin alâ-tarîkı’ş-şehâde ihbârlarıyla nümâyân olup lâkin gāib-i mezbûrun şer‘an huzûru lâzım olup mezbûr müsâfir ve derviş adam olmağla merhameten eşyayı ve bargirleri kendüye teslîm için fermân-ı âlîleri buyurulur ise emr-i veliyyü’l-emr ile teslîm olunmuş olup hîn-i iktizâda vedî‘a eden şahıs gelip hancı-ı mezbûrdan da‘vâ eder ise mu‘ârazadan men‘ olunmuş olur. Ol bâbda emir hazret-i veliyyü’l-emrindir. Fî 13 Rebî‘ülâhir sene 1155