Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 191 Hüküm no: 318 Orijinal metin no: [53a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Abdullah’ın muhtelif şahıslara olan borçlarının taksite bağlandığı Ma‘rûz Sahib-i arzuhâl es-Seyyid Abdullah dâyinlerinden Ali ve Ahmed ve Abdi ile mürâfa‘a-i şer‘-i şerîf olduklarında mezbûr es-Seyyid Abdullah’ın cihet-i deyn-i şer‘îden Ali’ye yetmiş guruş ve Ahmed’e otuz guruş ve Abdi’ye on dört guruş ve gāibûn ani’l-mesclis diğer Macar Ali’ye on yedi guruş ve Mustafa kapudana sekiz guruş ve İsmail kapudana kırk dört guruş ve Abdullah’a sekiz guruş ki cem‘an iki yüz guruş deyni olduğu ikrârıyla sâbit olup lâkin mezbûr es-Seyyid Abdullah mu‘sir ve mu‘dim olmağla def‘aten edâya bir vechile iktidârı olmadığını ve kâr u kisbden düyûnunun beher şehir ancak her bir guruşa birer para verebilir deyü mazbûtü’l-esâmî sekiz nefer kimesneler haber verdiklerinden sonra mezbûr es-Seyyid Abdullah’ın düyûnunun her bir guruşuna ayda birer paradan mezbûr Ali’ye târih-i i‘lâmdan her ay tamamında altmış para ve mezbûr Abdi’ye on dört para ve mezbûr Ahmed’e otuz para vermek üzere mezbûrûnun rızâlarıyla ibtidâ ve intihâsı ma‘lûm taksît-i sahîh ile taksît ve merkūmûn dahi râzı olmalarıyla sâir dâyinleri dahi taksît-i mezkûrdan ziyâde talebiyle rencîde etmemek bâbında fermân-ı âlî iltimâs eylediği huzûr-ı âlîlerine [i‘lâm] olundu. Bâkī fermân hazret-i men lehu’l-emrindir. Fî 15 Rebî‘ülâhir sene 1155