Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 198 Hüküm no: 334 Orijinal metin no: [55b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağcı İstefan ve kardeşi Polinhoron arasınaki yağhane hissesi anlaşmazlığın giderildiği Ma‘rûz Üsküdar’da yağcı tâifesinden İstefan v. Melid zikri âtî rub‘ hisseye vâzı‘u’l-yed olan karındaşı Polinhoron nâm zimmî ile mürâfa‘a-i şer‘-i şerîf olduklarında Üsküdar’da Selâmsız nâm mahâlde vâki‘ ma‘lûmü’l-hudûd bir bâb yağhânede mevcûd vezn ve keyli beynlerinde ma‘lûm şirûgan bezir ve simsim ve sâir âlât-ı ma‘lûmenin dört hissede iki hissesi an-aslin mesfûr İstefan’ın ve bir hissesi babaları mesfûr Melid’in ve bir hissesi ammileri olup mukaddemâ hâlik olan Paradmus nâm zimmînin mülkü olup mesfûr İstefan ammim hâlik-i mesfûr Paradmus hâl-i hayatında zikrolunan rub‘ hissesini semen-i ma‘lûma bana bey‘ etmekle selâse-i erbâ‘ı benim mülküm iken ancak iki hissesi benim zabtımda olup merkūm Paradmus’dan iştirâ eylediğim rub‘ hissemi merkūm Polinhoron bî-vech zabteder deyü iddi‘â eyledikde merkūm Polinhoron dahi yedinde olan hüccet-i şer‘iye mûcibince bin yüz elli senesinde mesfûr Paradmus hâl-i hayatında Ortaköy nâm karyede ve Üsküdar’da Eskihamam ve Köprübaşı nâm mahallerde vâki‘ yağhânelerde olan hissesiyle ma‘an Selâmsız yağhânesinde olan rub‘ hisse-i mezkûresini kendüye semen-i ma‘lûma bey‘ ve teslîm eylediğini mu‘addil ve müzekkâ şuhûd-ı udûlle mesfûrun muvâcehesinde vech-i şer‘î üzere isbât etmeğin mûcibince zikrolunan rub‘ hisse merkūm Polinhoron zimmînin mülk-i müşterâsı olduğu şer‘an sâbit olmağla müdde‘î-i mesfûr İstefan zikrolunan rub‘ hisseye bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 22 Rebî‘ülâhir sene 1155