Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 204 Hüküm no: 348 Orijinal metin no: [57b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamal Receb’in Hamal Hasan’a olan borcunu ödemesi Ma‘rûz-ı dâ‘î-i devlet-i aliyeleridir ki; Anadolu’da vâki‘ Tosya kasabası ahâlîsinden olup hâlâ Üsküdar’da sâkin hammâl tâifesinden Hasan yine tâife-i mezbûreden Receb muvâcehesinde mezbûr Receb târih-i i‘lâmdan üç sene mukaddem kasaba-i mezbûrede yedimden beher keyli ikişer guruşa olmak üzere yirmi beş guruşa on iki buçuk keyl şa‘îrimi iştirâ ve ahz etmekle semeni olan meblağ-ı merkūmu taleb ederim deyü ba‘de‘d-da‘vâ ve’l-inkâr müdde‘î-i mezbûr da‘vâ-yı mezkûresini yine tâife-i mezbûreden Mustafa b. Hızır ve Ömer b. Şa‘bân nâm kimesneler şehâdetleriyle vech-i şer‘î üzere isbât etmeğin mûcebince meblağ-ı merkūm yirmi beş guruşu müdde‘î merkūm Hasan’a edâ ve li-teslîme mezbûr Receb’e tenbîh-i şer‘î olunduğu bi’l-iltimâs huzûr-ı âlîlerine i‘lâm olundu. Fî 21 Cumâdelûlâ sene 1[1]55