Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 204 Hüküm no: 349 Orijinal metin no: [57b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil’in Bartın’daki ev ve bahçesine el koyan Mehmed Reis ile vârisleri arasındaki davanın ertelendiği Ma‘ruz Derûn-ı arzuhâlde mezkûr müteveffâ Halil’in verâseti anası İsmihan ve li-ümmin er karındaşı Hüseyin ve kız karındaşları Âişe ve Hatice ve Kezban’a münhasıra olduğu şer‘an mütehakkık olduktan sonra müteveffâ-yı mezbûrun anası sahibe-i arzuhâl İsmihan’ın hasmı olup arzuhâlde mezkûr müteveffâ-yı mezbûrun terekesinden Bartın kasabasında vâki‘ ma‘lûmü’l-hudûd menzil ile elma bağçesi ve erik bağçesine vâzı‘u’l-yed olan Mehmed Reis ile ba‘de’l-mürâfaha menzil ve bağçeler ile’l-vefât müteveffâ-yı mezbûrun mülkü ba‘de’l-vefât tashîh-i merkūm üzere bize mevrûs olmağla mezbûr Mehmed Reis bi-gayr-ı hakkın vaz‘-ı yed eder deyü da‘vâ ettikde mezbûr Mehmed Reis dahi cevâbında zikrolunan elma bağçesi babamdan müntekāl benim mülküm olup menzil ve erik bağçesi ammim müteveffâ zevcesi Fâtıma’dan iştirâ etmekle eytâmları vaz‘-ı yed eder deyü müteveffâ-yı mezbûr Halil’in mülkü olduğunu inkâr edip arâzî da‘vâsı mahâllinde istimâ‘ olunmağa muhtâc olmağın lâkin mezbûre İsmihan aceze makūlesinden olmağla mezbûr Mehmed Reis isti’zânını? getirince tarafeynin rızâlarıyla kırk güne değin imhâl olunup mezbûr Mehmed’in nefsine kefîl olmak üzere mübâşir kullarına tenbîh-i şer‘î olunduğu huzûr-ı âlîlerine i‘lâm olundu. Fî 23 Cumâdelûlâ sene 1155