Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 205 Hüküm no: 350 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Efendi’nin Çengelköy’deki evinde çalınan eşyaların bulunması talebinde herhangi bir kimseye suç isnad edilemediği Ma‘rûz-ı dâ‘î-i devletleridir ki, Vârid olan fermân-ı âlîlerine imtisâlen cânib-i şer‘den irsâl olunan Ahmed Efendi dâ‘îleri izzetlü bostancıbaşı ağa tarafından ta‘yîn olunan Ali Haseki ve Ahmed Haseki ile Çenger karyesine varıp cemâ‘at-ı Müslimîn huzûrlarında akd eylediği meclis-i şer‘de sahib-i arzuhâl Hasan Efendi târih-i i‘lâmdan on dört gün mukaddem karye-i mezbûrede vâki‘ menzilim derûnunda mevcûd olan ber-mûceb-i defter-i müfredât eşyâ-i ma‘lûmemden yüz seksen guruş kıymetli eşyâm serika olunmağla menzilim rü’yet ve ber-mûceb-i fermân-ı âlî tefahhus olunsun dedikde mezbûr Hasan Efendi’nin menzilini mu‘âyene eylediklerinde duvarlarında ve kapısında taşradan girilmeğe delâlet eder kesr ve hedm misillü nesne olmayıp ve ahâlî-i karye-i mezbûreden tefahhus ve suâl olundukda karye-i merkūmede ehl-i İslâm ve kefere cevâblarında bir sene mukaddem cümlemiz bâ-fermân-ı âlî birbirlerimize kefîle verilip hâlâ cümlemiz birbirlerimize kefîl olup içimizde bu makūle irtikâb eder kimesne yokdur müdde‘î-i mezbûrun mazannesi var ise beyân eylesin ve işbu eşyâ serika olmuşdur zaman ma‘lûm değil deyü mukābele ile cevâb eylediklerinde müdde‘î-i mezbûr Hasan Efendi dahi ta‘yîn ile işbu kimesne mazannemdir deyü bir kimseye ta‘ayyün etmeyip ve ahâlî dahi cümlesi birbirlerine kefîl olmarıyla merkūm dâ‘îleri mahâllinde tahrîr ve ümenâ-i şer‘ ve mübâşir-i mezbûrân ile gelip alâ-vukū‘ihî inhâ ve takrîr etmeleriyle fermân-ı âlîlerine imtisâlen huzûr-ı âlîlerine i‘lâm olundu, fermân hazret-i men lehu’l-emrindir. Fî 27 Ca Sene 1155