Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 205 Hüküm no: 351 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’e kalan mirasa Osman’ın velayeten el koyup kendi masrafına harcadığı Ma‘rûz, Sahib-i arzuhâl Mehmed hasmı olup arzuhâlde mastûrü’l-isim olan ceddi Osman ile mürâfa‘a-i şer‘-i şerîf olduklarında mezbûr Mehmed’in yedinde târih-i i‘lâm senesi Rebî‘ülâhiri’nin on ikinci günü târihiyle müverrah ve Adalar nâibi Osman Efendi dâ‘îlerinin imzâ ve hâtemiyle mümzâ ve mahtûme bir kıt‘a hüccet-i şer‘iyye nâtık olduğu üzere mezbûr Mehmed’in hâl-i sugrunda babası Eyüb ve anası Fâtıma ve kız karındaşı Hatice fevt olduklarında beher birinin tereke-i ma‘lûmelerinden mezbûr Mehmed’e ırsen isâbet ve intikāl eden min-haysü’l-mecmû‘ iki bin üç yüz guruşu merkūm Osman velâyeten ahz u kabz ve kendi mesârifine sarfla istihlâk eylediğini ba‘de’l-ikrâr mezbûr Osman emlâkinden olup karye-i mezbûrede vâki‘ hüccet-i şer‘iyyede tahdîd ve tavsîf olunan üç kıt‘a bağlarının sülüslerini ifrâz ve nısf menzili ile Üsküdar’da Hâce hatun mahallesinde vâki‘ ma‘lûmü’l-hudûd bir bâb mülk menzilinin dahi nısf-ı şâyi‘ini meblağ-ı merkūm mukābelesinde mezbûr Mehmed’e alâ-tarîkı’l-müsâlaha def‘ ve temlîk ve teslîm ol dahi ahz ve kabûl eyledikten sonra mezbûr Osman zikirleri mürûr eden üç kıt‘a bağlardan ifrâz ve teslîm eylediği sülüslere ve nısf menzilleri müte‘allika da‘vâdan mezbûr Mehmed’in zimmetini ibrâ eyledikde ol dahi hisse-i irsiye-i mezkûresine müte‘allika da‘vâdan mezbûr Osman’ın zimmetini ibrâ eylediği İsmail Çelebi b. İbrahim ve Mustafa b. Derviş ve diğer Mustafa b. Mehmed nâm kimesneler şehâdetleriyle vech-i şer‘î üzere sâbit olmağın mezbûr Osman zikirleri sebk eden üç kıt‘a müfrez bağlara ve iki bâb menzillerinin nısflarına bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 27 Cumâdelûlâ sene 1155