Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 206 Hüküm no: 352 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi Mehmed’in uygunsuz davranışlarından dolayı meslekten men edilmesi talebi Ma‘rûz, Üsküdar’da çörekçiler esnâfının kethudâsı Hüseyin yine esnâf-ı mezbûreden hasmı Mehmed ile mürâfa‘a-i şer‘-i şerîf olduklarında mezbûr Mehmed târih-i i‘lâmdan üç gün mukaddem Yeniçeşme nâm mahâlde mezbûr Hüseyin’in anasına ve avratına cimâ‘ lafzıyla ve sâir şütûm-ı galîza ile şetm ve ırzını hetk eylediği şuhûd-ı udûlle sâbit olup mezbûr Mehmed’e şer‘an ta‘zîr lâzım geldiğinden mâ‘âda yine esnâf-ı mezbûreden mazbûtü’l-esâmî cemm-i gafîr kimesneler meclis-i şer‘de mezbûr Mehmed kendi hâlinde olmamağla ehl-i ırzın ırzını hetk ve itâle-i lisân ve san‘at-ı mezbûrede ibâdullâha muzır ve nizâmımıza muhâl türlü türlü hareket âdet-i müstemirresi olduğunu muvâcehesinde ihbâr ve emniyetleri olmamağla san‘at-ı mezbûreden hacr ve men‘ olunmak bâbında fermân-ı âlî rica eyledikleri bi’l-iltimâs huzûr-ı âlîlerine i‘lâm olundu. Fî 28 Cumâdelûlâ sene 1155