Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 367 Hüküm no: 372 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. el-Hâc Mehmed’in evini oğlu es-Seyyid Abdülbâki Çelebi’ye sattığı Mübâya‘a: 2.500 Mahmiye-i İstanbul’da Laleliçeşme kurbünde Kuyumcu Bahşayiş Mahallesi’nde sâkine Âişe bt. el-Hâc Mehmed b. Ali nâm hatun tarafından husûs-ı âti’z-zikri ikrâra vekîl olduğu zât-ı mezbûreyi ma‘rifet-i şer‘iyye ile ârifân el-Hâcı Süleyman b. el-Hâc Abdullah ve el-Hâc Mehmed b. el-Hâc Muslu nâm kimesneler şehâdetleriyle sâbit olan mahalle-i mezbûre imâmı Abdullah Efendi b. Hüseyin meclis-i şer‘-i hatîr-i lâzımü’t-tevkīrde müvekkile-i mezbûrenin sadrî kebîr oğlu işbu bâ‘isü’l-kitâb es-Seyyid Abdülbâki Çelebi b. es-Seyyid Abdurrahman Efendi mahzarında bi’l-vekâle ikrâr-ı tâm ve takrîr-i kelâm edip akd-i âti’z-zikrin sudûruna değin müvekkilem mezbûre Âişe Hatun’un silk-i mülkünde münselik olup mahalle-i mezbûrede vâki‘ bir tarafdan imâm ve müezzine meşrûta Bâlizâde menzili ve bir tarafdan yine mezbûr es-Seyyid Abdülbâki Çelebi’nin tasarrufunda olan arsa-yı hâliye ve iki tarafdan tarîk-i âm ile mahdûd hâriciyyesinde tabaka-i ulyâda iki bâb oda ve bir sofa ve dehlîz ve kenîf ve vustâda bir bâb oda ve bir sofa ve dehlîz ve tahtânîde bir ahır ve kömürlük ve samanlık ve kenîf ve dâhiliyesinde tabaka-i ulyâda bir cihânnümâ ve vustâda iki bâb oda ve bir sofa ve kenîf ve tahtânîde bir hamam ve bir matbah ve kenîf ve iki bi’r-i mâ ve eşcâr-ı müsmire ve gayr-ı müsmireli bahçe ve mezbûr es-Seyyid Abdülbâki Çelebi ile müşterek bir bi’r-i mâ’yı muhtevî menzili bi-cümleti’t-tevâbi‘ ve’l-levâhık ve kâffeti’l-hukūk ve’l-menâfi‘ ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile oğlu merkūm es-Seyyid Abdülbâki Çelebi’ye iki bin beş yüz guruşa bey‘ ve temlîk ve teslîm eylediğinde ol dahi ber-minvâl-i muharrer iştirâ ve temellük ve tesellüm ve kabz ve kabûl ve semeni mezbûr iki bin beş yüz guruşu oğlu merkūm es-Seyyid Abdülbâki Çelebi yedinden tamamen ahz u kabz eylediğinden sonra menzil-i merkūmun tağrîr ve gabnini müte‘allika âmme-i da‘vâdan oğlu merkūm es-Seyyid Abdülbâki Çelebi’yi ibrâ ve iskāt eyledi. Ba‘de’l-yevm menzil-i mahdûd-ı mezkûr merkūm es-Seyyid Abdülbâki Çelebi’nin mülk-i müşterâsı olup müvekkile-i mezbûre Âişe Hatun’un kat‘â alâka ve medhali kalmamışdır. Keyfemâ-yeşâ ve yahtâr mutasarrıf olsun dedi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: El-hâc Mehmed b. Hasan, el-Hâc Ahmed b. el-Hâc Mustafa, İsmail b. Osman, es-Seyyid Ahmed Çelebi b. es-Seyyid Ali, Ali Çelebi b. Ali, Mustafa Çelebi b. Mehmed, Halil Ağa b. Yusuf, Bölükbaşı Mehmed Çelebi b. Abdullah.