Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 368 Hüküm no: 373 Orijinal metin no: [84a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiragos v. Serkiz’in evlatlık aldığı Mıgırdıç v. Mardiros’a nafaka bağlanması Mahmiye-i İstanbul’da Kumkapı kurbünde Nişancıpaşa Mahallesi’nde sâkin işbu hâfızü’l-vesîka Kiragos v. Serkiz nâm zimmî meclis-i şer‘-i şerîf-i enverde vilâyet-i Anadolu’da İznikmid kazâsına tâbi‘ Bahçecik nâm karye ahâlîsinden olup hâlâ mahalle-i mezbûrede müsâfireten sâkin olan Gülzâde nâm Nasrâniye muvâcehesinde takrîr-i kelâm ve bast ani’l-merâm edip mesfûre Gülzâde nâm Nasrâniyenin oğlu Mardiros nâm hâlikin firâşından hâsıl ve zevce-i metrûkesi Bağdagül bt. Vartan nâm hâlike’den mütevellid bi-hakkı’l-hıdâne hacr ve terbiyesinde olan işbu Mıgırdıç nâm sagīrin <> hizmetini görmekde âciz ve alîle ve pîrezen olmağla sagīr-i mezbûrun ammileri Penayot ve Asvador ve Sinan veledûn-ı Mardiros nâm zimmîler hâzır oldukları hâlde sagīr-i mezbûru [84b] li-ecli’t-terebbî ve’t-tebennî bana def‘ ve teslîm ben dahi yedinden ahz u kabz edip lâkin sagīr-i mezbûrun babasından müntakil mâlı olmamağla sagīr-i mezbûr nafaka ve kisveye ihtiyâcı olmağla sagīr-i mezbûr için kıbel-i şer‘den kadr-i kifâye akçe farz ve takdîr olunmak murâdımdır dedikde gıbbe’t-tasdîkı’ş-şer‘î hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri dahi sagīr-i mezbûrun nafaka ve kisve-bahâ ve sâir levâzım-ı zarûriyyesi’çün harc ve sarfa sagīr-i mezbûrun ammileri mesfûrûnun izin ve ma‘rifetleriyle târih-i vesîkadan yevmî on ikişer akçe nafaka ve kisve <> farz ve takdîr edip meblağ-ı mefrûz-ı mezkûru sagīr-i mezbûrun nafaka ve kisve ve sâir levâzım-ı zarûriyyesine harc ve sarfa ve lede’l-iktizâ istidâneye ve inde’z-zafer men-lehü’l-ahz ve’t-taleb üzerine rücû‘a mesfûr Kiragos zimmîye izin verilmeğin mâ-vaka‘a bi’t-taleb ketb olundu. Fi’l-yevmi’l-hâmis aşer min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Abdullah Çelebi b. Ahmed, Mehmed Çelebi b. Ahmed, Mehmed Çelebi b. Abdullah, Kādızâde Mustafa Çelebi b. ( ).