Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 210 Hüküm no: 360 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstavroz köyünde Zeyneb Hatun ile Havva Hatun arasındaki anlaşmazlığın giderildiği Ma‘rûz, Vârid olan fermân-ı âlîlerine imtisâlen cânib-i şer‘den irsâl olunan Ahmed Efendi dâ‘îleri İstavros karyesine varıp cemâ‘at-ı Müslimîn huzûrlarında akd-i meclis-i şer‘ olundukda sahibe-i arzuhâl Zeyneb Hatun’un câr-ı mülâsıkı olup arzuhâlde mezkûrü’l-ism Havva Hatun ile ba‘de’l-mürâfa‘a târih-i i‘lâmdan beş gün mukaddem bana elfâz-ı kabîha ile şetm ve hetk-i ırz etmekle mezbûre Havva dil-âzâr olup lisânından benim ve sâir karye sükkânının bir vechile emn ü râhatımız yokdur deyü da‘vâ ettikde mezbûre Havva dahi fimâ-ba‘d menzilinde kendi [hâlinde] olup kimesneye itâle-i lisân etmemeğe ta‘ahhüd eyledikten sonra mezbûrânın bu vechile beynleri tevfîk olunup kat‘-ı nizâ‘ eylediklerini mezbûr dâ‘îleri mahâllinde tahrîr ve ümenâ-i şer‘le meclis-i şer‘a gelip haber vermeğin bi’l-iltimâs huzûr-ı âlîlerine i‘lâm olundu. Fî 4 Cumâdelâhire sene 1155