Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 210 Hüküm no: 361 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah, Mustafa ve Ümmügülsüm’e Karasu Yenicesi ile Selmanlı ve Çekirdekli köylerinde kalan miras hususundaki taksimat Ma‘rûz, Arzuhâl sahibleri Abdullah ve Mustafa’nın taraflarından vekîlleri diğer Abdullah arzuhâlde zikrolunan kurâların sülüs hissesine ber-mûceb-i hüccet-i şer‘iyye mutasarrıf olan müvekkilân-ı mezbûrânın babalarının kız karındaşı mezbûre Ümmügülsüm nâm hatunun oğlu ve vekîli Mustafa ile bi’l-vekâle mürâfa‘a olduklarında mezbûre Ümmügülsüm’ün yedinde olan temlîknâme-i hümâyûn ve hücec-i şer‘iyye mûcebince Karasu Yenicesi nâhiyesinde tarlasına ve Gümülcine nâhiyesinde Çekirdekli ve Selmanlı nâm karyelerde vâki‘ cibâl ve arâzî ve yaylak ve kışlak ve enhâr ve eşcâr ve korular bin elli beş senesinde Behram Kethudâ’ya temlîk olunup tedâvül-i eyâdî ile mezbûr Behram Kethudâ’nın oğlu Abdullah ve Abdullah’dan dahi oğlu Ali Ağa’ya ırsen intikāl eyledikde ber-mûceb-i hüccet-i şer‘iyye yüz on beş senesi târihinden mezbûr Ali Ağa zikrolunan kurânın üç hissede bir hissesini semen-i ma‘lûma zevcesi Âişe’ye bey‘ edip ba‘dehû yüz elli beş senesinde mezbûre Âişe’nin kızı müvekkile-i merkūme Ümmügülsüm’e semen-i ma‘lûma bey‘ ve teslîm eylediğini nâtık senedât-ı şer‘iyyesi mezbûr Abdullah ve Mustafa’nın vekîli muvâcehesinde ibrâz ve feth [ve] kırâet olup bu târihe gelince mülkiyet üzere mutasarrıf olduğu huzûr-ı âlîlerine i‘lâm olundu. Fî 5 Cumâdelâhire sene 1155