Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 213 Hüküm no: 367 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail’e kardeşi Ahmet’in Davut Paşa mahallesinde zabtettiği arsadan dolayı olan borcunu ödemesi Ma‘rûz, Medîne-i Üsküdar’da sâkin İsmail karındaşı Ahmed muvâcehesinde mezbûr Ahmed târih-i i‘lâmdan on ay mukaddem medîne-i merkūmede Davud Paşa mahallesinde vâki‘ lede’l-ahâlî ve’l-cîrân mâ‘lûmü’l-hudûd olup icâreteyn ile taht-ı tasarrufumda olan bir bâb vakıf menzil arsasında olan nısf hissesi bâ-ma‘rifet-i mütevellî iki yüz elli guruş bedel mukābelesinde benden tefevvüz ve kabûl ve zabtedip meblağ-ı merkūmun elli guruşunu bana teslîm bâkī iki yüz guruşu mezbûr Ahmed’in zimmetinde kalıp hatta meblağ-ı merkūm cihet-i mezkûrdan bana deyni olduğunu târih-i mezkûrda ikrâr ve yedime işbu temessüğünü dahi i‘tâ eyledi deyü ba‘de’d-da‘vâ ve’l-inkâr müdde‘î-i mezbûr müdde‘âsını lede’t-tezkiye adâletleri zâhir Haffâf el-Hâc İbrahim b. Abdüşşekûr ve Hasan Çelebi b. el-Hâc İbrahim nâm kimesneler şehâdetleriyle vech-i şer‘î üzere isbât etmeğin mezbûr Ahmed dahi arsa-i mezbûru alıp zabteylediği ikrâr, mûcebince meblağ-ı merkūm iki yüz guruşu müdde‘î-i mezbûr İsmail’e edâ ve teslîme karındaşı mezbûr Ahmed’e tenbîh olunduğu bi’l-iltimâs huzûr-ı âlîlerine i‘lâm olundu. Fî 8 Cumâdelâhire sene 1155