Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 213 Hüküm no: 368 Orijinal metin no: [60b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Bedel Vakfı’ndan harab olan dükkânların arsasının bina yapılmak üzere kiraya verilmesi Ma‘rûz, Sahib-i arzuhâl Ali Ağa taht-ı nezâret-i dâ‘îlerinde olan evkāfdan arzuhâlde mezkûr el-Hâc Bedel Vakfı’nın kāimmakam mütevellîsi el-Hâc Mahmud Efendi muvâcehesinde vakf-ı mezkûrdan olup icâre-i mu‘accele ve beher yevm on altışar akçe icâre-i müeccele ile taht-ı tasarrufumda olan tahtında dekâkîni müştemil bir bâb hâne harâb olmağla târih-i i‘lâmdan üç sene mukaddem küllen münhedim ve arsa-i sırfa kalmağla müceddeden ebniye ihdâs[ına] galle-i vakfın müsâ‘adesi olmayıp hâne binâ olunmak memnû‘âtdan olmağla icâresine kesr ve noksan tertîb etmesiyle dahi icâre-i mezkûre ecr-i mislinden ezyed olup arsa-i mezkûreden intifâ‘ dahi mümkün olmadığından târih-i mezkûrda fesh-i icâre eylemişdim, müddet-i mezbûreden beri arsa-i mezbûre hâlî ve icâresi vakfa vâsıl olmayıp ve mu‘accelesine mahsûben ebniye ihdâs eder tâlibi dahi olmamağla mu‘attal kalmağın hâlâ icâre-i mu‘accele-i sâbıkamı henüz istifâ eylediğimden mâ‘adâ bu def‘a dahi cânib-i vakfa ben yüz on iki guruş icâre-i mu‘accele ve bî-garaz Müslimînin haberleriyle müte‘ayyen olan icâre-i müeccele-i misliyesiyle ve ihdâs edeceğim dekâkîn ve ebniye-i sâireyi mâlımdan mu‘accelesine mahsûb olmak üzere istîcara tâlib olduğum ecilden mütevellî-i mezbûr istintâk olunup husûs-ı mezbûre cânib-i vakfa enfa‘ ve ben ecnebiden evlâ olduğuma binâen minvâl-i muharrer üzere bana îcâra izin verilsin dedikde mütevellî-i mezbûr dahi tasdîk ve bi’l-iltimâs cânib-i şer‘den irsâl olunan Mehmed Efendi dâ‘îleri arsa-i mezkûreye varıp ba‘de’l-mu‘âyene arsa-i mezbûrenin meblağ-ı merkūm yüz on iki guruş el-yevm icâre-i mu‘accele-i misliyesi olup arsa-i mezbûrenin çarşı tarafına ancak dört dükkân binâ olunmağa tahammülü olup mâ‘âdasına âhar ebniye olmağla icâre-i müeccele-i misliye dahi ancak yevmî on akçe istîcâr olup bir vechile ziyâdeye tahammülü olmadığını ve husûs-ı merkūm cânib-i vakf[a] enfa‘ olduğunu mazbûtü’l-esâmî elli neferden mütecâviz bî-garaz Müslimîn icmâ‘ ve ittifâk ve ihbâr eylediklerini mezbûr dâ‘îleri mahâllinde tahrîr ba‘dehû meclis-i şer‘a gelip inhâ eylediklerinden sonra ber-minvâl-i muharrer ve îcâr mütevellî-i merkūma kıbel-i şer‘den izin verildiği bi’l-iltimâs huzûr-ı âlîlerine i‘lâm olundu. Fî 7 Cumâdelâhire sene 1155