Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 369 Hüküm no: 374 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni Melkon’un terekesine karısı Saltana’yı vasi ve bazı Ermenileri nazır tayin ettiği Mahmiye-i İstanbul’da Langa-i kebîr kurbünde Şeyh Ferhad Mahallesi’nde mütemekkin Melkon v. Armiya v. Kogaz nâm Ermeni tarafından husûs-ı âti’z-zikri ikrâra vekîl olduğu el-Hâc Mehmed b. Mahmud ve Ya‘kub Çelebi b. Mehmed nâm kimesneler şehâdetler[iyle] şer‘an sâbit olan Kazar v. Avanis nâm Ermeni meclis-i şer‘-i şerîf-i enverde mü[v]ekkile-i mezbûrenin [mü[v]ekkil-i mezbûrun] zevce-i menkûhası bâ‘isetü hâzihi’l-vesîka Saltana bt. Marat nâm Ermeni muvâcehesinde bi’l-vekâle ikrâr-ı tâm ve takrîr-i kelâm edip mü[v]ekkil-i mezbûr Melkon hasta olmağla bi-emri’llâhi te‘âlâ hâlik olduğunda cemî‘ terekesinden mu‘tâd üzere mikdâr-ı kifâye akçe ile lâşesi taht-ı arza ba‘de’l-ilkā, [terekenin] sülüsü ifrâz ve sülüs-i mezkûr Ermeni fukarâsına tasadduk oluna ve mâ‘adâ sülüsân terekesi vârisleri olan zevcesi mezbûre Saltana ile anası Hayran bt. ( ) ve oğlu Kazar v. Ağnik ve kızları Nişko ve Ağniti v. [binteyn] mersûm nâm sagīrler beynlerinde alâ-mâ-farazallâhu iktisâm olunup sıgār-ı merkūmûnun hadd-i bülûğ ve rüşd-i sedâdlarına değin hisse-i irsiyyelerini zabt u hıfz ve vesâyâ-yı mezkûresini tenfîze zevcesi merkūme Saltana’yı vasiyy-i muhtâr nasb ve sarraf tâifesinden Avakim v. Marat ve Sekbas v. Vartan ve Ekmekçi Haçok v. Nikogos ve Varsam v. Melkon nâm Ermenileri merkūme Saltana üzerine nâzır ta‘yîn eyledikde mezbûrûndan her biri zikrolunan vesâyet [ve] nezâreti kabûl ve merâsimini edâya ta‘ahhüd ve iltizâm eylediler dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-şehri Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Ali Efendi b. Abdullah el-imâm, Osman Halîfe b. Abdurrahman el-müezzin, Süleyman Efendi b. Abdurrahman, el-Hâc Mehmed b. Mahmud, Berber Seyyid Osman Çelebi b. ( ), Ya‘kub Çelebi b. Mehmed, İbrahim Çelebi b. el-Hâc Mehmed.