Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 218 Hüküm no: 377 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer, Mustafa ve Bekir hakkındaki şikayetin araştırılması Ma‘rûz, Vârid olan fermân-ı âlîlerine imtisâlen Ekrâd tâifesinden mezbûrûn Ömer ve Mustafa ve Bekir’in ahvâlleri tefahhus olundukda mezbûrûnun bostanları olan mahalle karîb Nerdübânlı karyesi ahâlîleri mezbûrûn karyemizde sâkinler olmayıp serika ile müttehem oldukları ma‘lûmumuz değildir, lâkin karyemizde bostanlarda meks ve şurb-i hamr ve nâ-mahrem avratlar ile ihtilât etmeleriyle karyemizde olsalar kefîl olmayız deyü ihbâr ve mezbûr Ömer’in sâkin olduğu Reis mahallesi imâmı ve ahâlîsi dahi mezbûr bekâr olup anası ile ma‘an on seneden beri mahallemizde sâkin olup sârik olduğu ma‘lûmumuz değildir ve mukaddemâ mezbûr Ömer’e bizler kefîl olmayıp karındaşı Ahmed kefîl olup biz dahi mezbûr Ahmed’e kefîl olmuşuzdur deyü ihbâr ve mezbûrân Mustafa ve Bekir mahallâtda sâkin olmamalarıyla ahvâlleri mechûle olduğu huzûr-ı âlîlerine i‘lâm olundu. Fî 16 Cumâdelâhire sene 1155