Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 370 Hüküm no: 375 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Ahmed ile eşi Osman b. Abdullah’ın muhala‘a yoluyla boşandıkları Mahrûse-i Galata muzâfâtından kasaba-i Tophane mahallâtından Sakabaşı Mahallesi sâkinelerinden olup zâtı Mehmed Çelebi b. Ali ve Mustafa Çelebi b. Ahmed ta‘rîfleriyle mu‘arrefe olan Emine bt. Ahmed nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb Osman b. Abdullah nâm kimesne mahzarında ikrâr-ı tâm ve takrîr-i kelâm edip mezbûr Osman zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdun-aleyh sekiz bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve zevcim mezbûr Osman’a medfû‘um olan elli guruş bedel-i hul‘ olup ve meûnet-i süknâm dahi kendi üzerime olmak üzere zevcim mezbûr Osman ile muhâla‘a-i sahîha-i şer‘iyye ile muhâla‘a eylediğimde ol dahi hul‘-ı mezbûru kabûl eylediğinden sonra hukūk-ı zevciyyete [ve] beynimizde ma‘lûm eşyâ da‘vâsına müte‘allika âmme-i da‘vâdan mezbûr Osman’ın zimmetini ibrâ-i âmm-ı râfi‘u’l-hısâm ile ibrâ ve iskāt eylediğimde ol dahi kezâlik hukūk-ı zevciyyete [ve] beynimizde ma‘lûm eşyâ da‘vâsına müte‘allika âmme-i da‘vâdan benim zimmetimi ibrâ-i âmm-ı râfi‘u’l-hısâm ile ibrâ ve iskāt edip kat‘â birbirimiz ile [85a] vechen mine’l-vücûh ve sebeben mine’l-esbâb da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşer min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Ali Usta b. Abdi, diğer Ali Usta b. Ahmed, Ahmed Usta b. Ali, Saka Ali Beşe b. İbrahim, Mehmed Çelebi b. Ali, Mustafa Beşe b. Ahmed.