Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 221 Hüküm no: 383 Orijinal metin no: [62b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayreddin Çavuş mahallesinde oturan Fatma’dan bâyinen boşanan Ömer’in belirtilen meblağı ödemesi Ma‘rûz, Üsküdar’da Hayreddin Çavuş mahallesinde sâkine Fâtıma bt. Hasan b. Abdullah nâm hatunun anası ve tarafından husûs-ı atî’z-zikri da‘vâ ve talebe vekîl-i sâbitü’l-vekâlesi İsmihan müvekkile-i mezbûrenin zevci es-Seyyid Ömer muvâcehesinde mezbûr es-Seyyid Ömer târih-i kitâbdan üç ay mukaddem mahalle-i mezbûre imâmı ve sâir cemâ‘at-ı Müslimîn huzûrlarında eğer ben fîmâ-ba‘d şurb-i hamr ve ekl-i esrâr edersem veyâhûd menzilime şâbb-ı emred oğlan getirirsem zevcem mezbûre benden talâk-ı bâyin ile mutallaka olsun deyü müvekkilem merkūmeye hitâb ve şart ve ta‘lîk eyledikden sonra bugün şurb-i hamr edip ve menziline şâbb-ı emred oğlan getirmekle müvekkilem mezbûre mutallaka olmağın altı bin akçe mehr-i müeccelini ve nafaka-i iddet-i ma‘lûme ve me’ûnet-i süknâsını bi’l-vekâle taleb ederim [63a] deyü da‘vâ, mezbûr es-Seyyid Ömer müvekkile-i mezbûre Fâtıma altı bin akçe mehr-i müeccel tesmiyesiyle zevcesi olduğunu ikrâr ve şart ve ta‘lîk[i] inkâr edicek, vekîl-i mezbûr ber-minvâl-i muharrer şart ve ta‘lîkini ve şart ve ta‘lîkinin vukū‘uyla mutallaka olduğunu Mustafa Efendi ve el-Hâc Mehmed nâm ma‘dûl ve müzekkâ kimesneler şehâdetleriyle isbât etmeğin mûcebince ba‘de’l-hükm mehr-i müecceli olan meblağ-ı merkūm altı bin akçe ile nafaka-i iddet ve me’ûnet-i süknâsı için dahi bi’t-terâzî beş yüz akçe ki cem‘an altı bin beş yüz akçeyi müvekkile-i mezbûreye edâ ve teslîme mezbûr es-Seyyid Ömer’e tenbîh olunduğu bi’l-iltimâs huzûr-ı âlîlerine i‘lâm olundu. Fî 15 Cumâdelâhire sene 1155