Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 221 Hüküm no: 384 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çolak Çorbacıbağı’nda cesedi bulunan kadınlarla ilgili araştırma yapıldığı Abdi, Ömer ve Ahmet adlı zanlıların yakalanıp sevk edildiği Ma‘rûz, Bundan akdem bu dâ‘îlerine ve izzetlü bostancıbaşı ağaya hitâben Üsküdar bağlarından Çolak Çorbacı bağında katîl bulunan avratların kātilleri tefahhus oluna deyü şeref-bahş-ı sudûr eden emr-i âlîşâna imtisâlen Üsküdar ustası kulları ve ağa-yı mûmâ-ileyh tarafından ta‘yîn olunan Haseki kulları Ekrâd tâifesinden olup bir sene mukaddem Üsküdar’da Çinili Hamam külhânda katl ve ihrâk-ı nâr bulunan kimesnenin kātili olmak üzere târih-i mezbûrda ahz ve beş ay mikdârı olup üzerine sâbit olmamağla fîmâ-ba‘d Üsküdar’da meks etmemek üzere habsden ıtlâk olunan Abdi b. Abbas Üsküdar’da Kuşoğlu Yokuşu nâm mahâlde bu menzilde hufyeten sâkin olduğu tecessüs olunmağla gece ile menziline mahallesi imâmı ve ahâlîsiyle duhûl eylediklerinde mezbûr Abdi ve karındaşı Ömer ve Zeyneb nâmında bir avrat ile ma‘an ahz ve ihzâr-ı şer‘-i şerîf olunduklarında mezbûrân Abdi ve Ömer mezbûre Zeyneb nâ-mahrem olduğunu dahi i‘tirâf ederler ve mezbûrların enişteleri Kürd Ahmed dahi Üsküdar’da Toygar Hamza mahallesinde bu menzilde sâkin olmağla ol dahi ahz ve mezbûr Abdi madde-i mezbûreden mâ‘ada üç def‘a katl töhmetiyle müttehem olduğu mütevâtir olmağla mezbûrûn Abdi ve Ömer ve Ahmed husûs-ı mezbûrda dahi mazanne olunmalarıyla mezbûre Zeyneb ile ma‘an huzûr-ı âlîlerine irsâl olundu. Fî 18 Cumâdelâhire sene 1155