Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 222 Hüküm no: 385 Orijinal metin no: [63a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb’in havale masrafının karşılanması ve damlalığına müdahale etmemesi konusunda Hatice’ye tenbihte bulunulduğu Ma‘rûz, Bundan akdem âhara arzuhâl üzere şeref-bahş-ı sudûr eden fermân-ı âlîlerine imtisâlen taraf-ı şer‘den irsâl olunan Mehmed Efendi dâ‘îleri hâssa mi‘mârı hulefâsından ( ) ile sahibe-i arzuhâl Zeyneb’in câr-ı mülâsıkı Hatice Hatun’un menziline varıp akd eylediği meclis-i şer‘de mezbûre Hatice menzili sakfının üzerine müceddeden ihdâs eylediği tahta-pûşundan mezbûre Zeyneb’in menzilinin makarr-ı nisvân olan mahâlline havâlesi zararı olduğu mu‘âyene ve zararını def‘e tenbîh olundukda mezbûre Hatice havâlesi zararını mezbûre Zeyneb’in penceresi dibinden tahta perde ile def‘ murâd ettikde merkūme Zeyneb dahi mahâll-i merkūm kendi menzili ile mezbûre Hatice’nin menzili mâ-beyninde işbu mu‘âyene olunan tûlen altı zirâ‘ ve arzen yirmi bir parmak damlalığım olup kadîmi sakfın damlası cereyân edegelen damlalığımdır deyü iddi‘â eyledikde bâ-vesâtet-i muslihûn mezbûre Hatice kendi rızâsıyla tahta-pûşunun iki aded nerdübânını ref‘ ve âhar mahalle vaz‘ ve tahta-pûşu döşemesinden tûlen üç zirâ‘ ve kadden üç zirâ‘ tahta perde ile havâlesini def‘a ta‘ahhüd eylediğini mezbûr dâ‘îleri inhâ eylemiş idi, lâkin mezbûre Hatice ber-minvâl-i muharrer ta‘ahhüdünden rücû‘ etmekle mezbûre Zeyneb dahi ber-vech-i muharrer tûlen altı zirâ‘ ve arzen yirmi bir parmak kadîmi damlalığı olduğunu udûlden Abdullah Efendi b. Abdurrahman ve el-Hâc Mustafa b. Mehmed şehâdetleriyle mezbûrenin muvâcehesinde isbât etmeğin mûcebince mezbûre Zeyneb’in havâle zararını def‘ ve zikrolunan damlalığına müdâhale etmemek üzere mezbûre Hatice’ye tenbîh-i şer‘î olunduğu bi’l-iltimâs huzûr-ı âilerine i‘lâm olundu. Fî 16 Cumâdelâhire sene 1155