Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 370 Hüküm no: 376 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afîfe bt. Abdullah’ın Hâce Dürrî Hatun’un azatlısı olduğunu şahitler huzurunda ispatladığı Itâknâme, bâ-imzâ-i hazret-i efendi. Mahmiye-i İstanbul’da Tozkoparan Mahallesi’nde sâkine olup zâtı ta‘rîf-i şer‘î ile mu‘arrefe olan Hâce Dürrî Hatun bt. Abdullah dîvân-ı hazret-i sadrâzamîde ma‘kūd meclis-i şer‘-i şerîf-i enverde kendiye rıkkıyeti sâbıkına mu‘terife olan râfi‘atü’l-vesîka Afîfe bt. Abdullah nâm hatun mahzarında üzerine da‘vâ ve takrîr-i kelâm edip mezbûre Afîfe câriye-i memlûkem olmağla bana rıkkıyetden imtinâ‘ eder suâl olunup tenbîh olunmak murâdımdır dedikde gıbbe’s-suâl mezbûre Afîfe cevâbında fi’l-vâki‘ müdde‘iyye-i mezbûre Hâcce Dürrî Hatun’un bundan esbak câriye-i memlûkesi olduğunu i‘tirâf lâkin merkūme Dürrî Hatun târih-i kitâbdan yirmi dört sene mukaddem mâlından beni tahrîr i‘tâk ve kayd-ı rıkkıyetden ıtlâk etmekle ben sâir harâir-i asliyyât gibi hürre olmuşidi[m] deyü def‘le mukābele edicek isre’l-istintak ve’l-inkâr merkūme Afîfe Hatun’dan müdde‘âsına mutâbıka beyyine taleb olundukda udûl-i ahrâr-ı ricâl-i Müslimînden olup mahmiye-i mezbûrede Davudpaşa iskelesi kurbünde Kasab İlyas Mahallesi’nde sâkin Hasan b. Hüseyin ve Mehmed b. Ramazan ve Mehmed b. Mustafa nâm kimesneler li-ecli’ş-şehâde meclis-i şer‘a hâzirûn olup istişhâd olunduklarında fi’l-vâki‘ işbu müdde‘iyye mezbûre Hâcce Dürrî Hatun mezbûre Afîfe’yi târih-i kitâbdan yirmi dört sene mukaddem yedinde câriye-i memlûkesi olduğu hâlde bizim huzûrumuzda mâlından tahrîr ve i‘tâk ve kayd-ı rıkkıyetden ıtlâk ve sâir harâir-i asliyyât zümresine idrâc ve ilhâk eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle mezbûre Afîfe’nin ıtkına hükm-birle mezbûre Hâcce Dürrî Hatun mu‘ârazadan men‘-birle mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Mehmed Ağa b. Mehmed kethüdâ-yı muhzırân, Salih Çelebi b. Süleyman, Tahtacı Mehmed Çelebi b. Abdullah, Mustafa Çelebi b. Mehmed, İbrahim Efendi b. Ali.