|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 250 Hüküm no: 348 Orijinal metin no: [51b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Emine bt. Mustafa’nın kocası Mehmed ile anlaşarak boşandığı (muhâla‘a)
Kazâ-yı Gemlik tevâbi‘inden Karaca Ali karyesinde sâkine Emine bt. Mustafa nâm hatun kıbelinden âti’z-zikr hul‘ ve ibrâya vekâleti kendisini ma‘rifet-i şer‘iyye ile ârifân olan karye-i mezbûre ahâlîsinden Süleyman b. Mehmed ve el-Hâc Davud b. Muslı’nın şehâdetiyle sâbit bulunan Reyhan bt. Mustafa nâm hatun meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzıra olup müvekkile-i mezbûresinin zevci hâmil-i hâze’l-kitâb Mehmed b. Ali ile muhâla‘a etti. Zevc-i mezbûr dahi nikâhında ma‘kūdün-aleyh râyicü’l-vakt sekiz bin akçe mehr-i müecceli, nafaka-i iddeti ve meûnet-i süknâsı mukābelesinde zevce-i mezbûresi ile hul‘ eyledi. Mezbûre Emine bu sûretle akd-i cedîd ve mehr-i müste’nif olmadan zevc-i mezkûra helâl olmayacak şekilde bâyinen ayrılmış oldu. Sonra hukūk-ı zevciyyete müte‘allik cemî‘ de‘âvîden her biri diğerinin zimmetini ibrâ-yı âmm-ı kātı‘un li’n-nizâ‘ ile ibrâ etti.
Cerâ zâlike ve hurrire fi’l-yevmi’s-sânî aşere min-Cumâdelûlâ li-sene erba‘a ve sittin ve elf.
Şuhûdü’l-hâl: Ali Beşe b. Mehmed çukadâr, Rıdvan b. Abdullah, İbrahim Çelebi b. Davud er-ressâm, Pîrî b. Hüseyin kāim-i makām, el-Hâc Şa‘bân b. Mehmed l-muhzır
|