Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 371 Hüküm no: 377 Orijinal metin no: [85a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayzar v. Avram ve Zerhiba v. Magasid’in Hasköy’deki Yahûdhane ve dükkanları Süleyman Ağa’ya sattıkları Mübâya‘a. Medîne-i Hazret-i Ebî Eyyüb el-Ensârî -aleyhi’r-rahmeti’l-Bârî- kazâsına tâbi‘ kasaba-i Hasköy mahallâtından Mu‘allim Mahallesi ahâlîsinden Hayzar v. Avram ve Zerhiba v. Magasid nâm Yahûdiler meclis-i şer‘-i şerîf-i enverde bâ‘isü hâze’l-kitâb Süleyman Ağa b. Abdullah b. Abdurrahman tarafından husûs-ı âti’z-zikri tasdîka vekîl olduğu ber-nehc-i şer‘î sâbit olan Mehmed b. Mehmed b. Abdullah mahzarında her biri ikrâr ve takrîr-i kelâm edip akd-i âtî sudûruna değin ale’l-iştirâki’s-seviyy yedimizde mülk ve hakkımız olup mahalle-i mezbûrede vâki‘ bir tarafdan Hurmail mülkü ve bir tarafdan Hayzar ve Kimil ve Kolozda mülkleri ve bir tarafdan İsak Yahûdi mülkü ve bir tarafdan tarîk-i âm ile mahdûd üç tabaka olup tabaka-i ulyâda iki bâb oda ve bir sofa ve bir matbah ve vustâsında iki bâb oda ve bir sofa ve bir matbah ve kenîfleri ve iki kepenk dükkânı müştemil mülk Yahûdhâneyi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkil-i mezbûr Süleyman Ağa’ya dokuz yüz on dört guruşa bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr dokuz yüz on dört guruşu ale’l-iştirâki’s-seviyy yedinden tamamen ahz u eyledik. Min-ba‘d zikrolunan Yahûdhâne ve dükkânlarda bizim kat‘â alâka ve medhalimiz kalmayıp müvekkil-i merkūm Süleyman Ağa’nın mülk-i müşterâsı olmuşdur. Keyfemâ-yeşâ ve yahtâr mutasarrıf olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mustafa Odabaşı sekban, es-Seyyid Mustafa Efendi b. Ahmed, Mehmed Efendi b. Ahmed, es-Seyyid Mehmed Efendi b. Ahmed, Mustafa Efendi b. Ahmed, Mehmed Çelebi b. Ahmed, Mehmed Çelebi b. Şa‘ban, İbrahim Çelebi b. Ahmed.