Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 231 Hüküm no: 405 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Ağa’nın sattığı eşyaların bedelini Emetullah’a ödemesi Ma‘rûz, Zâtı vech-i şer‘î üzere mu‘arrefe olan sahibe-i arzuhâl Emetullah hasmı Yusuf ile mürâfa‘a-i şer‘-i şerîf olduklarında mezbûre Emetullah arzuhâlde zikreylediği vech üzere ber-mûceb-i defter-i müfredât mezbûr Yusuf’a emâneten teslîm etmek üzere iddi‘â eylediği eşyâ-yı ma‘lûmeyi mezbûr Yusuf Ağa bi’l-külliye inkâr edip lâkin mezbûrenin eşyâsından dört aded minder ve on aded yasdık yünleri ki min-haysü’l-mecmû‘ iki yüz doksan vakıyye olup beher vakıyyesi on birer paraya olmak üzere cem‘an dokuz bin beş yüz yetmiş akçeye ve iki yemenî yorganını dahi üçer buçuk guruşdan sekiz yüz kırk akçeye mezbûre Emetullah’ın zevci gāib ani’l-meclis el-Hâc Hüseyin zevcesi mezbûrenin tarafından bana bey‘ ve teslîm etmekle ben dahi iştirâ ve ahz u kabz edip hâlâ semenleri olan cem‘an on bin dört yüz on akçe zimmetimde kalmışdır deyü müdâfa‘a edicek, gıbbe’l-istintâk mezbûre Emetullah bey‘-i mezbûru tecvîz ve semenlerini taleb etmeğin mezbûr Yusuf’un ikrârı mûcebince meblağ-ı mecmû‘-ı merkūm on bin dört yüz on akçeyi sahibe-i arzuhâle edâ ve teslîme mezbûr Yusuf’a tenbîh-i şer‘î olunup mâ‘adâ eşyâsını beyân için mezbûre Emetullah şâhide havâle olunduğu huzûr-ı âlîlerine i‘lâm olundu. Fî-gurreti Recebi’l-ferd sene 1155