Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 372 Hüküm no: 378 Orijinal metin no: [85b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin duvarı üzerine bina yapan Hakimzâde el-Hâc Mustafa Ağa’nın zimmetini ibra ettiği Husûs-ı âti’l-beyânın mahallinde istimâ‘ ve tahrîri için sâdır olan fermân-ı âlîye imtisâlen cânib-i şer‘-i hatîrden irsâl olunan keşif nâibimiz Mevlânâ Mehmed Abdullah Efendi hâssa mi‘mârlarından Ali Halîfe b. Ahmed ile Mahmiye-i İstanbul’da Hobyar Mahallesi’nde vâki‘ Mustafa Efendi b. Mehmed’in sâkin olduğu menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mûmâ-ileyh Mustafa Efendi meclis-i ma‘kūd-ı mezkûrda câr-ı mülâsıkı Hâkimzâde es-Seyyid el-Hâc Mustafa Ağa b. İbrahim mahzarında üzerine da‘vâ ve takrîr-i kelâm edip mezbûr es-Seyyid el-Hâc Mustafa işbu bir tarafdan el-Hâc İbrahim mülkü ve bir tarafdan kendi mülküm olan bahçe arsası ve bir tarafdan mezbûr es-Seyyid el-Hâc Mustafa Ağa mülkü ve bir tarafdan tarîk-i âm ile mahdûd mülk bahçem arsasında vâki‘ mi‘mâr-ı mezbûr mesâhası üzere tûlen on sekiz buçuk zirâ‘ ve kadden ma‘a temel altı zirâ‘ ve arzen bir zirâ‘ taş duvarımı mezbûr es-Seyyid el-Hâc Mustafa Ağa gasbedip bi-gayr-ı hakkın üzerine iki kat ebniye ihdâs etmekle suâl olunup duvarım üzerinde binâsının ref‘i için tenbîh olunmak murâdımdır dedikde gıbbe’s-suâl mezbûr es-Seyyid el-Hâc Mustafa Ağa cevâbında müdde‘î-i mûmâ-ileyhin ber-vech-i muharrer iddi‘â eylediği duvar-ı mezkûr kendi mülküm olan menzilim duvarından olmağla üzerine ebniye ihdâsına mübâşeret eyledim deyü müdde‘î-i mezbûrun mülk duvarı olduğunu inkâr etmekle <> mûmâ-ileyh Mustafa Efendi’nin müdde‘âsını isbât etmek üzere iken merkūm es-Seyyid el-Hâc Mustafa Ağa duvar-ı mezkûr mûmâ-ileyh Mustafa Efendi’nin mülkü olup kendinin alâkası olmadığın ikrâr u i‘tirâf etmekle duvar-ı mezkûr mûmâ-ileyh Mustafa Efendi’nin mülkü ve hakkı olduğu şer‘an mütebeyyin ve zâhir oldukdan sonra mûmâ-ileyh Mustafa Efendi yine meclis-i ma‘kūd-ı mezkûrda merkūm es-Seyyid el-Hâc Mustafa Ağa mahzarında ikrâr-ı tâm ve takrîr-i kelâm edip mezbûr es-Seyyid el-Hâc Mustafa Ağa’nın ihdâs eylediği ancak ebniyesi tahtında vâki‘ bâlâda zikrolunan tûlen on sekiz zirâ‘ ve kadden ma‘a temel altı zirâ‘ ve arzen bir zirâ‘ sed taş duvarım ba‘de’l-ifrâz ve’t-ta‘yîn tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile elli guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr elli guruş mütâlebesinden merkūm es-Seyyid el-Hâc Mustafa Ağa’nın zimmetini ibrâ ve iskāt eyledim. Ba‘de’l-yevm vech-i meşrûh üzere duvar-ı mezkûr merkūm es-Seyyid el-Hâc Mustafa Ağa’nın mülk-i müşterâsı olmuşdur. Keyfemâ-yeşâ ve yahtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Çukadâr el-Hâc Ali b. Abdurrahman ve Mustafa b. Mehmed ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sânî aşer min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: es-Seyyid Mustafa b. Halil, es-Seyyid Osman b. Mustafa, Abdullah Ağa b. Hasan Ağa, Müezzin Hüseyin Çelebi b. Mehmed, Mustafa Çelebi b. Mehmed, Mehmed Efendi b. İsmail, Hüseyin Efendi b. İsmail, el-Hâc Mustafa b. Mehmed, Ali Çavuş b. Ahmed, Hasan Beşe b. Hasan, Şevneci Ahmed Beşe b. Hüseyin, Hüseyin Ağa b. Hasan, Mustafa Çelebi b. Ahmed, Ahmed Çelebi b. Osman.