Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 235 Hüküm no: 413 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panayot’un mirasının varisleri arasında paylaşılması ve alacağının tahsil edilmesi Ma‘rûz, Derûn-ı arzuhâlde mastûrü’l-ism olup dört sene mukaddem medîne-i Selanik’de hâlik olan Panayot v. ( ) nâm zimmînin verâseti hâlâ Selanik sükkânından zevce-i metrûkesi Manola nâm Nasrâniye ile sulbî kebîr oğulları Dimo ve Tomo’ya ve sagīr oğlu Manola ve sulbiye sagīre kızı Dezeri’ye munhasıra ve tashîh-i meselesi sekiz sehimden olup bir sehimi zevcesi mezbûreye ve ikişer sehimi oğulları merkūmûndan herbirine ve bir sehimi kızı mersûmeye isâbeti tahakkukundan sonra ashâb-ı arzuhâl verese-i merkūmûndan mesfûr Dimo sâbıkā Selanik müftîsi olup hâlâ Üsküdar’da müsâfiren sâkin Abdurrahman Efendi ile bi’t-terâfu‘ mürâfa‘a-i şer‘-i şerîf olduklarında mezbûr Abdurrahman Efendi’nin ber-mûceb-i temessük hâlik-i merkūm Panayot’a cihet-i deyn-i şer‘îden dört yüz yetmiş beş guruş deyni olup meblağ-ı merkūmun yüz yetmiş üç guruşunu hayatında kendüye edâ edip bâkī zimmetinde üç yüz iki guruş deyni kalıp meblağ-ı merkūmun tashîh-i mezkûr üzere yetmiş beş buçuk guruşu sahib-i arzuhâl mersûm Dimo’ya isâbet eylediği mezbûr Abdurrahman Efendi’nin ikrârıyla sâbit ve meblağ-ı merkūm yetmiş beş buçuk guruşu merkūm Dimo’ya edâ ve teslîme mezbûr Abdurrahman Efendi’ye ba‘de’t-tenbîh mezbûr Abdurrahman Efendi dahi meblağ-ı merkūm mukābelesinde emlâkimden hâlik mezbûre irtihân eylediğim yüz guruş kıymetli bir çift altın bilezik ile yine hâlik-i merkūmun zimmetinde mütevellisi olduğum vakıf mahzen icâresinden dokuz senede müctemi‘a olan seksen bir guruş hakkım vardır deyü iddi‘â ve merkūm Dimo icâre-i merkūme anam mezbûrenin deynidir deyü hâlik-i mersûmun icâre ve deynini ve rehn-i mezbûru inkâr etmekle mezbûr Abdurrahman Efendi müdde‘âlarını beyân için şâhide havâle olunduğu mübâşirleri çavuş kulları iltimâsıyla huzûr-ı âlîlerine i‘lâm olundu. Fî 11 Recebi’l-ferd sene 1155