Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 373 Hüküm no: 379 Orijinal metin no: [85b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Râbia Hatunun evinin vereseleri arasında ifraz ve taksimi Husûs-ı âti’l-beyânın mahallinde keşif ve tahrîr ve taksîm bâbında sâdır olan fermân-ı şerîfe imtisâlen savb-ı şer‘-i enverden keşif nâibimiz Mehmed Abdullah Efendi irsâl olunup ol dahi hâssa mi‘mârlarından el-Hâc Mustafa b. Ahmed ve Ali b. Abdullah nâm halîfeler ile mahmiye-i İstanbul’da Âşıkpaşa kurbünde el-Hâc Ferhad Mahallesi’nde vâki‘ bir tarafdan Osman Beşe menzili ve iki tarafdan el-Hâc Abdullah menzili ve bir tarafdan tarîk-i âm ile mahdûd fevkānî üç bâb oda ve bir matbah ve bir kenîf ve havluyu müştemil mülk menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde menzil-i mahdûd-ı mezkûra mutasarrıfe olup bundan akdem vefât eden Râbia bt. Ali Efendi nâm hatunun verâseti zevc-i metrûku es-Seyyid Veli Ağa ile babası mezbûr Ali Efendi ve anası Hadice bt. İsmail nâm hatuna ve sadrî oğulları es-Seyyid Abdullah ve es-Seyyid İsmail ve es-Seyyid Süleyman’a münhasıra olup kable’l-kısme merkūm es-Seyyid Süleyman dahi vefât edip verâseti babası mezbûr es-Seyyid Veli’ye ve kıbeli’l-üm ceddesi merkūme Hadice Hatun’a münhasıra olup kable’l-kısme merkūm Ali Efendi [86a] dahi vefât edip verâseti zevcesi merkūme Hadice Hatun’a ve sulbî kebîr oğlu el-Hâc Mehmed ve sulbiye kebîre kızı Âişe nâm hatuna münhasıra ve tashîh-i mes’elesi bi-tarîkı’l-münâsahati’ş-şer‘iyye beş bin yüz seksen dört sehmden i‘tibâr olunup sihâm-ı mezkûreden yedi yüz yirmi sehm merkūm es-Seyyid Abdullah’a ve bin dört yüz on dokuz sehm merkūme Hadice Hatun’a ve iki bin otuz sehmi mezbûr el-Hâc Mehmed’e ve bin on beş sehmi mezbûre Âişe Hatun’a isâbeti tahakkukundan sonra merkūm el-Hâc Mehmed meclis-i ma‘kūd-ı mezkûrda merkūm es-Seyyid Abdullah ve zâtları ta‘rîfi’ş-şer‘î ile mu‘arrefetân olan mezbûretân Hadice ve Âişe hatunlar mahzarlarında ikrâr ve takrîr-i kelâm edip işbu akd-i meclis-i şer‘-i şerîf olunan menzil-i mahdûd-ı mezkûr müteveffât-ı evvel mezbûre Râbia Hatun’un terekesinden olup tashîh-i mezkûr üzere bize isâbet ve intikāl edip menzil-i mahdûd-ı mezkûrun yüz kırk beş sehm hisse-i şâyi‘ine irsen ve şirâen mâlik olan merkūm Ali Efendi fevt olup menzil-i mahdûd-ı mezkûr kābil-i taksîm ve intifâ‘ mümkün olmağla bana isâbet eden iki bin otuz sehm hisse-i şâyi‘am ifrâz ve alâmât-ı fâsıla vaz‘ıyla mümtâz kılınmak matlûbumdur dedikde gıbbe’t-tasdîkı’ş-şer‘î mi‘mârân-ı mezbûrân menzil-i mahdûd-ı mezkûru mesâha eylediklerinde tûlen ve arzen bi-hesâb-ı terbî‘i binâ ma‘a zemîn yüz otuz zirâ‘ olup beher zirâ‘ı ikişer yüz yetmişer akçeden otuz beş bin yüz akçeye bâliğ olmağın meblağ-ı merkūm-ı mezkûrdan on üç bin yedi yüz otuz altı akçesi merkūm el-Hâc Mehmed’e ve dokuz bin altı yüz on dokuz akçesi merkūme Hadice’ye ve dört bin sekiz yüz yetmiş akçesi mezbûr es-Seyyid Abdullah’a ve altı bin sekiz yüz yetmiş sekiz akçesi merkūme Âişe Hatun’a isâbeti tahakkukundan sonra menzil-i mahdûd-ı mezkûru zokak (sokak) kapısı köşesinden karşı duvara varınca Osman Beşe tarafından dolma duvar ve kâriz beynlerinde müşterek olmak üzere on bir bin yüz doksan akçe kıymetle elli bir zirâ‘ binâ ma‘a zemîn merkūm el-Hâc Mehmed’in hissesine ta‘yîn ve tahsîs olunup mâ‘adâ menzil-i mahdûd-ı mezkûr merkūm es-Seyyid Abdullah ve mezbûretân Hadice ve Âişe’nin hisselerine ta‘yîn ve tahsîs olunup merkūm el-Hâc Mehmed’in hissesinden iki bin beş yüz on yedi akçesi merkūmdan es-Seyyid Abdullah ve Hadice ve Âişe’nin ta‘yîn olunan hisselerinde olmağın meblağ-ı mezbûr merkūm el-Hâc Mehmed’e teslîm olunup her biri hisse-i müfrezelerini ba‘de’l-kabz ve’l-kabûl husûs-ı mezkûra müte‘allika da‘vâdan her biri âharın zimmetini ibrâ ve iskāt eylediklerini mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Çukadâr İbrahim Beşe b. Mehmed ve Muhzır Mustafa b. Mehmed ile meclis-i şer‘a gelip alâ-vukū‘ihi inhâ ve takrîr etmeğin hıfzan li’l-makāl mâ-vaka‘a bi’t-taleb ketb olundu. Bâ-hazret-i efendi, taksîm. Fi’l-yevmi’l-âşir min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mustafa Ağa b. Süleyman, el-Hâc Abdurrahman b. Süleyman, Hasan Beşe b. Mehmed, Mustafa Çelebi b. Ebûbekir, Ali Beşe b. Mustafa, Berber Hasan Çelebi b. Abdullah, Ömer Çelebi b. Attâr.