Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 125 Hüküm no: 4 Orijinal metin no: [1b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuzguncuk köyünden Yahudi Göncüoğlu İlya’nın açtığı muhdes meyhanenin kapatılması Ma‘rûz Medîne-i Üsküdar’a tâbi‘ Kuzguncuk karyesi mütemekkinlerinden Avram v. Yasef ve Yasef v. Yako ve Avram v. Yako ve Nesim v. İsak ve İlya v. Yako ve sâir isimleri cerîdede mastûr yirmi dört nefer Yahûdî ve zimmîlerden herbiri meclis-i şer‘-i hatîrde bast-ı kelâm ve ta‘bîr ani’l-merâm edip yine karye-i mezbûrede mütemekkin Göncüoğlu İlya nâm Yahûdî bu esnâda karye-i mezbûrede kendi menzilinde tarîk-ı cadde üzerine memnû‘âtdan olan müceddeden meyhâne küşâd ve ihdâs ve hamr ve arak bey‘ine mübâşeret ve bu vechile zümre-i eşkıyânın kesret ve vefret üzere cem‘iyetine bâdî ve küşâd eylediği meyhâne mahâlli dahi tarîk-ı cadde olup fesâd olacağı zâhir ve mazarratı cümlemize sirâyet edeceği bâhirdir deyü teşekkî birle zikr olunan meyhâne muhdes olup mazarratı olduğunu ihbâr ve fîmâ-ba‘d merkūm İlya Yahûdî kendi menzilinde küşâd ve ihdâs eylediği meyhâne-i mezkûr sedd ü bend olunmak bâbında fermân-ı âlîleri sudûrunu istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 3 min-Ca sene 1204