Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 375 Hüküm no: 380 Orijinal metin no: [86a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mehmed Ağa ile İsmail b. Mustafa ve kardeşi Mehmed’in hisselerine göre evde belirli süreler oturmayı taahhüd ettikleri Mahmiye-i İstanbul’da <> Kumkapı kurbünde Çadırcı Ahmedçelebi Mahallesi’nde vâki‘ bir tarafdan el-Hâc Mehmed Ağa ve bir tarafdan Sarracbaşı ( ) ve bir tarafdan İsmail Bey menzilleri ve bir tarafdan tarîk-i âm ile mahdûd ma‘lûmü’l-müştemilât menzilin arsası Ali Efendi Vakfı’na senede üç guruş icâre-i müeccele ve ebniyesi on altı sehmden iki sehmine şirâen mâlik olan el-Hâc Mehmed Ağa b. İbrahim nâm kimesne meclis-i şer‘-i şerîf-i lâzımü’ş-şerîfde menzil-i mahdûd-ı mezkûrun mâ‘adâ on dört sehmine irsen mâlikler olan Mehmed ve İsmail ibney Mustafa b. Abdullah nâm sagīrlerin vâlideleri ve kıbel-i şer‘den mansûbe vasiyyeleri bâ‘isetü hâzihi’l-vesîka Emine bt. Abdullah nâm hatun mahzarında ikrâr ve takrîr-i kelâm edip menzil-i mahdûd-ı mezkûr ber-vech-i muharrer kābil-i kısmet olmamağla muhâyeeten sâkin olmak üzere her birimiz râzı olduğumuz ecilden târih-i kitâbdan yedi sene tamamına değin menzil-i mahdûd-ı mezkûrda sagīrân-ı mezbûrân Mehmed ve İsmail ve vâlideleri mezbûre Emine Hatun ile ma‘an sâkin olup müddet-i mezbûre tamamından sonra bir sene ben sâkin olup minvâl-ı meşrûh üzere zabt ve tasarrufa ta‘ahhüd eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min-şehri Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Yunus Beşe b. Yusuf, Ahmed Beşe b. Mustafa, Mustafa Beşe b. Mustafa, Ahmed b. Hasan.