Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 375 Hüküm no: 381 Orijinal metin no: [85a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası Ali Beşe’den boşanan Fâtıma bt. Ahmed’in yanındaki çocuğu Mehmed’e nafaka bağlanması Mahmiye-i İstanbul’da Karabaş Mahallesi sâkinelerinden olup zâtı Hüseyin Beşe b. Mahmud ve Ahmed Beşe b. Ömer ta‘rîfleriyle mu‘arrefe olan bâ‘isetü hâzihi’l-vesîka Fâtıma bt. Ahmed nâm hatun meclis-i şer‘-i hatîr-i lâzımü’t-tevkīrde zevc-i sâbıkı Ali Beşe b. Mehmed mahzarında takrîr-i kelâm ve tâ‘bir ani’l-merâm edip mezbûr Ali’nin firâşından hâsıl ve benden mütevellid bi-hakkı’l-hıdâne hacr ve terbiyemde olan işbu sadrî oğlum Mehmed nâm sagīrin nafaka ve kisveye [86b] ihtiyâcı olmağla kıbel-i şer‘den babası mezbûr Ali Beşe üzerine kadr-i kifâye meblağ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakki‘-ı sadr-ı kitâb -tûbâ-lehû ve hüsnü meâb-hazretleri dahi mezbûr Mehmed’in nafaka ve kisve-bahâsı’çün târih-i kitâbdan babası mezbûr Ali Beşe üzerine bi’t-terâzî beher yevm dörder akçe farz ve takdîr edip meblağ-ı mefrûz-ı mezbûru sagīr-i merkūmun nafaka ve kisve ve sâir levâzım-ı zarûriyyesi’çün harc ve sarfa ve lede’l-iktizâ istidâneye ve inde’z-zafer babası mezbûr Ali Beşe üzerine rücû‘a mezbûre Fâtıma Hatun’a izin verilmeğin mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Hüseyin Beşe b. Mahmud, Ömer Beşe b. Ömer, Ahmed Beşe b. Ömer, el-Hâc İsmail Ağa b. el-Hâc Mehmed, Mehmed Çelebi b. Abdullah bölükbaşı, İbrahim Çelebi b. Mustafa du‘âcı, Ya‘kub b. Abdullah muhzır.