Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 130 Hüküm no: 15 Orijinal metin no: [2b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mekkari Seyyid Hacı Abdullah’ın kiraya verdiği katırları ile eşya bedellerinden kalan alacağının ödenmesi Ma‘rûz Mekkârî tâifesinden es-Seyyid el-Hâc Abdullah b. el-Hâc Ahmed medîne-i Üsküdar’da mahfil-i bâbda meclis-i şer‘-i hatîrde el-Hâc Mehmed [b.] İsmail mahzarında mezbûr el-Hâc Mehmed târih-i i‘lâmdan bir sene mukaddem Edirne’ye azîmet etmekle ben dahi ücret ile âhara îcâr için emlâkımdan on üç res bârgirlerim ile mekûlât için dahi nakden yirmi guruş yedine def‘ ü teslîm ol dahi ahz ve âhara îcâr ve ücretlerinden makbûzu olan yetmiş sekiz guruş ve yine emlâkımdan fuzûlî âhara bey‘ eylediği eşyâ-i mütenevvi‘a-i ma‘lûm[e] esmânından kırk dokuz buçuk guruş ve medyûnum gāib ani’l-meclis İsmail nâm kimesneden emrimle makbûzu olan altmış guruş ki cem‘an iki yüz yedi buçuk guruş makbûzundan elli beş guruş zikr olunan bârgirlerin mekûlâtına sarf ve bâkī kalan yüz elli iki buçuk guruş zimmetinde hakkım olup hattâ târih-i i‘lâmdan üç gün mukaddem huzûr-ı Müslimînde ancak zikr olunan ücretden elli dört guruş ve gāib-i mezbûrdan altmış guruş ve eşyâ semeninden olan beş buçuk guruş ki cem‘an yüz on dokuz buçuk guruş makbûzundan elli beş guruşunu zikrleri mürûr eden bârgirlerin mekûlâtına ba‘de’s-sarf bâkī kalan altmış dört buçuk guruş zimmetinde bana deyni olduğunu ikrâr dahi etmekle taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr el-Hâc Abdullah mezbûr el-Hâc Mehmed’in ikrâr-ı meşrûhunu lede’t-tezkiye adâletleri zâhir olan es-Seyyid el-Hâc Mustafa b. el-Hâc İbrahim ve es-Seyyid el-Hâc Hasan b. es-Seyyid el-Hâc Mustafa nâm kimesneler şehâdetleriyle vech-i şer‘î üzere muvâcehesinde isbât etmeğin mûcebiyle meblağ-ı mecmû‘-ı merkūm altmış dört buçuk guruşu müdde‘î-i mezbûra edâ ve teslîme mezbûr el-Hâc Mehmed’e şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 2 min-Ca sene 1204