Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 130 Hüküm no: 16 Orijinal metin no: [2b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şamlı Hüseyin Ağa’nın kiraladığı iki katırın bedelini ödediği halde katırların kendisine teslim edilmediğinden parasının iadesi Ma‘rûz Medîne-i Üsküdar’da misâfiren sâkin Şamlı Hüseyin Ağa b. el-Hâc Hasan nâm kimesne medîne-i mezbûrede mahfil-i bâbda meclis-i şer‘-i hatîrde Mekkârî Osman b. el-Hâc Ali nâm kimesne mahzarında mezbûr Osman işbu târih-i i‘lâm senesi hac mevsiminde Şâm-ı şerîf’den Üsküdar’a gelince eşyâ tahmîli için iki res bârgirini yüz yirmişer guruşdan iki yüz kırk guruş ücret kavliyle bana îcâr ben dahi istîcâr ve kabûl ve ücretleri olan meblağ-ı merkūm iki yüz kırk guruşu ber-vech-i peşîn yedine def‘ ü teslîm edip lâkin zikr olunan bârgirleri bana teslîm etmeyip âhar kimesneye îcâr etmekle medfû‘um olan meblağ-ı merkūm iki yüz kırk guruşu mezbûr Osman’dan istirdâd ederim deyü ba‘de’d-da‘vâ ve’l-istintâk ve’l-ikrâr alâ-mûcebi ikrârihî meblağ-ı merkūm iki yüz kırk guruşun edâsıyla mezbûr Osman şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 5 min-Ca sene 1204