Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 376 Hüküm no: 382 Orijinal metin no: [86b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zamantı mukataası mültezimi Fethullah Ağa b. Abdullah’a kanuna aykırı vergi almaması için tenbih olunması Vilâyet-i Anadolu’da medîne-i Kayseriye mahallât ve kurâlar mütemekkinlerinden olup mahmiye-i İstanbul’da Parmakkapı kurbünde Kurşunlu hânda müsâfiren mütemekkinler olan işbu ashâbü’s-sifr Dunik v. Kirkor ve Norsis v. Toros ve Badımşah v. Atanaş ve Mardiros v. Bogos ve Avas v. Serkiz ve Bogos v. Kirkor ve Danyel v. Atam ve İmran v. Haçok ve Arslan v. Avanis ve Ağya v. Toros ve Hacir v. Margos ve Komri v. Nergis ve Zigi v. Çerkis ve Poldok v. Körih ve Palos v. Dehan ve Avanis v. Serkis ve Serkiz v. Kirkor ve Bogos v. Atam ve Köçek v. ( ) ve Sahak v. Kirkor ve Armiya v. Avanis ve Agop v. Timur ve Takor v. Timur ve Malkon v. Takor ve Avanis v. Kirkor ve Ayan v. Bağdasar ve Nikoz v. Tozlo ve Karakoç v. Tozlo nâm Ermeniler meclis-i şer‘-i şerîf-i enverde mahmiye-i mezbûrede Akşıkpaşa kurbünde sâkin Fethullah Ağa b. Abdullah mahzarında her biri üzerine da‘vâ ve takrîr-i kelâm edip mezbûr Fethullah Ağa işbu sene-i müteberrikede medîne-i mezbûre civârında Maraş sancağında vâki‘ Zamantı mukāta‘asını iltizâm etmekle biz ebâ-an-ced medîne-i mezbûre re‘âyâ ve ra‘iyyeti oğlanlarından olmamızla bâ-fermân-ı âlî üzerimize edâsı lâzım gelen avârız ve bedel-i nüzûl ve sâir tekâlifimizi kabza memûr olan zâbitlerimize edâ edip bu ana gelince zikrolunan Zamantı mukāta‘ası mültezimlerine nesne veregeldiğimiz ve mukaddemâ mukāta‘a-i mezkûre mültezimleriyle bi’d-defa‘ât murâfa‘a-i şer‘ olduğumuzda ber-vech-i muharrer yedinde sûret-i defter re‘âyâ ve ra‘iyyet oğulları olduğumuz müte‘ayyin olmamağın bî-vech mu‘ârazadan men‘ ve kıbel-i şer‘den yedimize hüccet ve i‘lâm ve mûcebince fermân-ı âlî ihsân olunmağın hâlâ mezbûr Fethullah Ağa mukāta‘a-i mezbûre mültezimi olmağla suâl olunup zikrolunan senedlerimize ba‘de’n-nazar bî-vech mu‘âraza etmemek üzere tenbîh olunması matlûbumuzdur deyü min-külli’l-vücûh takrîrlerine muvâfık senedât ibrâz ettiklerinde mezbûr Fethullah Ağa mazmûnlarını ikrâr u i‘tirâf etmeğin mûcebince ba‘de’t-tenbîh mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min-şehri Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Tahtacı Mehmed Çelebi b. Abdullah, Kādızâde İbrahim Çelebi, Ahmed Çelebi b. Hasan, Kasım Çelebi b. ( )