Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 137 Hüküm no: 32 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan Yorgi’nin başka birine borcunu ödemesi için Aleksan’a verdiği paranın Aleksan’ın teslim edilmemesinden dolayı iadesi Ma‘rûz Medîne-i Üsküdar’da Atpazarı kurbünde Bağçevân Yorgi v. Dovin nâm zimmî mahfil-i bâbda meclis-i şer‘-i hatîrde Aleksan v. Hıristo nâm zimmî muvâcehesinde târih-i i‘lâmdan on dört ay mukaddem gāibetü ani’l-beled dâyinem olup ismi ma‘lûmum olmayan Nasrâniyeye îsâl ve teslîm için işbu merkūm Aleksan zimmî yedine bi-tarîki’l-emâne on iki guruş def‘ ü teslîm ol dahi kabz edip lâkin meblağ-ı merkūmu gāibe-i merkūmeye teslîm etmeyip hâlâ zimmetinde olmağla taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm ber-vech-i muharrer müdde‘âsını beyândan ızhâr-ı acz birle talebiyle merkūm Aleksan zimmîye yemîn teklif olundukda yemînden nükûlüyle sâbit olmağın mûcebiyle meblağ-ı merkūm on iki guruşu müdde‘î-i merkūma edâ ve teslîme merkūm Aleksan zimmîye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 15 min-Ca sene 1204