Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 138 Hüküm no: 34 Orijinal metin no: [4a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Hacı Hüseyin’in, babasının kendisine hibe ettiği cariyeyi Osman b. Mehmed’den alması Ma‘rûz Mahmiye-i İslâmbol’da Silivrikapısı kurbünde sâkine mu‘arrefetü’z-zât Hadice bt. el-Hâc Hüseyin nâm hatun medîne-i Üsküdar’da mahfil-i bâbda meclis-i şer‘-i hatîrde zikri âtî câriyeye vâzı‘ü’l-yed olan Osman b. Mehmed nâm kimesne ile terâfu‘larında babası mezbûr el-Hâc Hüseyin hâzır olduğu hâlde babam mezbûr emlâkinden orta boylu açık kaşlı Habeşiyyetü’l-asl Müslimetü’l-mille Mahbube nâm câriyesini bundan akdem bana hibe-i sahîha-i şer‘iye ile hibe ve temlik ve teslîm eylediğinde ben dahi meclis-i hibede bilâ-mâni‘ ittihâb ve temellük ve tesellüm ve kabûl edip bu vechile mezbûre Mahbube mülk-i mevhûbem iken mezbûr Osman menzilinde fuzûlî iskân etmekle suâl olunup câriye-i mezbûreyi bana teslîme mezbûr Osman’a tenbîh olunmak matlûbumdur deyü da‘vâ ettikde mezbûr Osman cevâbında hâzır-ı mezbûr câriye-i mezkûreyi bana emâneten teslîm ben dahi ba‘de’t-tesellüm câriye-i mezkûreyi bu vechile menzilinde iskân ettiğini ve hâzır-ı mezbûr el-Hâc Hüseyin kızı müdde‘iye-i mezbûreye hibe ettiğini herbiri ikrâr ve i‘tirâf etmeğin mûcebiyle câriye-i mezkûreyi müdde‘iye-i mezbûre Hadice Hatun’a teslîme mezbûr Osman’a şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 25 min-Ca sene 1204