Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 377 Hüküm no: 383 Orijinal metin no: [86b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası Mehmed Beşe b. Hasan’dan boşanan Ümmügülsüm bt. Ali’nin yanındaki çocuğu Ayşe’ye nafaka bağlanması Mahmiye-i İstanbul’da Debbâğzâde Mahallesi sâkinelerinden olup zâtı Ebûbekir Beşe b. el-Hâcı Ömer ve Ali Beşe b. Mehmed nâm kimesneler ta‘rîfleriyle mu‘arrefe olan Ümmügülsüm bt. Ali nâm hatun meclis-i şer‘-i şerîf-i enverde zevc-i sâbıkı Mehmed Beşe b. Hasan nâm kimesne mahzarında takrîr-i kelâm ve tâ‘bir ani’l-merâm edip mezbûr Mehmed Beşe’nin firâşından hâsıla ve benden mütevellide olup hâlâ bi-hakkı’l-hıdâne hacr ve terbiyemde olan işbu sadriye sagīre kızım Âişe nâm sagīrenin nafaka ve kisveye eşedd-i ihtiyâcı olmağla kıbel-i şer‘den kadr-i kifâye nafaka ve kisve-bahâ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i [87a] muvakki‘-ı sadr-ı kitâb -tûbâ-lehû ve hüsnü meâb- efendi hazretleri dahi sagīre-i mezbûrenin nafaka ve kisve-bahâsı’çün babası mezbûr Mehmed’in üzerine bi’t-terâzî târih-i kitâbdan beher yevm ikişer para nafaka ve kisve-bahâ farz ve takdîr edip meblağ-ı mefrûz-ı mezbûru sagīre-i mezbûre Âişe’nin nafaka ve kisve-bahâsına harc ve sarfa ve lede’l-iktizâ istidâneye ve inde’z-zafer mezbûr Mehmed Beşe üzerine rücû‘a mezbûre Ümmügülsüm Hatun’a izin verilmeğin mâ-vaka‘a bi’t-taleb ketb olundu. Fi’l-yevmi’s-sâmin aşer min-şehri Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: İbrahim Çelebi b. Mustafa, Ebûbekir Beşe b. el-Hâc Ömer, Ali Beşe b. Mehmed, Ahmed Çelebi b. Hasan.