Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 142 Hüküm no: 43 Orijinal metin no: [4b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa’nın Kuzguncuk köyü subaşısı ve beytülmal emini olan Bostancı Süleyman Ağa’dan satın aldığı bahçe satışının gabn-i fahiş nedeniyle iptal edilmesi davasında sulh olduğu Ma‘rûz Medîne-i Üsküdar’da Kādıasker mahallesi sükkânından Hasan Ağa b. Hüseyin nâm kimesne medîne-i mezbûrede mahfil-i bâbda meclis-i şer‘-i hatîrde medîne-i mezbûrede [mezbûreye] tâbi‘ Kuzguncuk karyesinde subaşı ve emîn-i beytü’l-mâl olan Bostanî Süleyman Ağa b. Mehmed nâm kimesne mahzarında mezbûr Süleyman Ağa işbu târih-i i‘lâm senesi Saferi’l-hayr’ın yirmi yedinci günü karye-i mezbûrede vâki‘ Ayvalı demekle meşhûr etrâf-ı erba‘ası Kemal oğlu Yako mülkü ve Abacı Kosti mülkü ve tarîk-ı âm ile mahdûd eşcâr-ı müsmire ve gayr-ı müsmire bir kıt‘a bağçe bundan akdem karye-i mezbûre papası iken bilâ-vâris hâlik olan zimmînin terekesini bi’l-emâne kabz ve terekesinden bağçe-i mahdûd-ı mezkûr mahlûl olmağla mahlûlünden yüz yirmi guruşa bâ-hüccet-i şer‘iye bana bey‘ ve temlik ben dahi iştirâ ve temellük ve kabûl etmiş idim lâkin bağçe-i mezkûrenin semen-i misli elli guruş iken mezbûr Süleyman Ağa bağçe-i mezkûra ba‘de’l-müzâyede yüz yirmi guruş semen-i mislidir deyü beni tağrîr edip bu vechile bey‘-i mezkûr tağrîr-i gabn-ı fâhiş ile olmağla bey‘-i mezkûru red ve semen-i mezkûru istirdâd ederim deyü eylediği da‘vâsından elli guruş bedel-i makbûz mukābelesinde mezbûr Süleyman Ağa ile sulh olup tağrîr-i gabn-ı fâhişe ve bi’l-cümle husûs-ı mezkûra müte‘allika âmme-i de‘âvîden mezbûr Süleyman Ağa’nın zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 24 min-Ca sene 1204