Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 377 Hüküm no: 384 Orijinal metin no: [87a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Mehmed’in Dergâh-ı âlî yeniçerileri nukuduna müvelli Mehmed Beşe’den para aldığı ve karşılığında bazı eşyasını rehin verdiği Dergâh-ı âlî yeniçerilerinin yetmiş birinci saksonculara mahsûs oda neferâtının mühimmâtlarına mevkūfe nukūda bi’l-fi‘il mütevellî olan bâ‘isü hâze’l-kitâb Mehmed Beşe b. Ramazan nâm kimesne meclis-i şer‘-i şerîf-i enverde İbrahim b. Mehmed mahzarında bi’t-tevliye üzerine da‘vâ ve takrîr-i kelâm edip sâhib [gāib] ani’l-meclis zikrolunan oda neferâtından es-Seyyid Mehmed b. Habib b. Abdullah bin yüz kırk iki senesi Muharremi’l-harâmı gurresinde bir sene tamamına değin nukūd-ı mevkūfe-i mezkûreden işbu yedimde olan temessük mantûkunca yedimden istidâne ve kabz eylediği sekiz yüz altmış yedi buçuk guruş mukābelesinde yedinde mülkü olup mahrûse-i Galata ebvâbından Azebkapısı hâricinde vâki‘ işkenbeci dükkânı dâhilinde mevcûd ber-mûceb-i defter-i müfredât eşyâ-i ma‘lûmesini bana rehin vaz‘ ve teslîm ben dahi ber-vech-i muharrer ahz u kabz eylediğimden sonra deyn-i mezkûru târih-i mezkûrdan bir sene tamamına değin bana edâsı müyesser olmaz ise rihân-ı mezkûreyi semen-i misli ile âhara bey‘ ve kabz-ı semen ve semen-i mezkûrdan deyn-i mezbûru bana edâ ve fazla kalırsa kendiye îsâle ve bunlar mütevakkıf olduğu umûrun küllîsine azl ve in‘izâlden masûne vekâlet-i devriye ile tarafından mezbûr İbrahim’i vekîl ve nâib-i menâb nasb ve ta‘yîn eyledikde ol dahi ba‘de’l-kabûli’l-vekâle gāib-i mezbûr es-Seyyid Mehmed meblağ-ı mezbûru bana edâ etmeyip ve vakti dahi hulûl etmeğle rihân-ı mezkûreyi âhara bey‘ ve meblağ-ı mezbûru bana edâya vekîl-i merkūma tenbîh olunması bi’t-tevliye matlûbumdur deyü ba‘de’d-da‘vâ ve’l-inkâr müdde‘î-i mezbûrdan müdde‘âsına mübeyyine beyyine taleb olundukda udûl-i ahrâr-ı ricâl-i Müslimînden İvaz Odabaşı b. Abdullah ve Mahmud Odabaşı b. Osman ve Mehmed Odabaşı b. el-Hâc Hüseyin ve İsmail Beşe b. Selim nâm kimesneler li-ecli’ş-şehâde meclis-i şer‘a hâzirûn olup isre’l-istişhâd fi’l-hakīka zikri mürûr eden oda neferâtından gāib ani’l-meclis es-Seyyid Mehmed b. Habib b. Abdullah bin yüz kırk iki senesi Muharremi’l-harâmı gurresinden bir sene tamamına değin nukūd-ı mevkūfe-i mezkûreden işbu yedinde olan deyn temessükü mantûkunca istidâne eylediği sekiz yüz altmış yedi buçuk guruş deyni mukābelesinde yedinde mülkü olup mahrûse-i Galata hısnı ebvâbından Azebkapısı hâricinde vâki‘ işkenbeci dükkânında mevcûd ber-mûceb-i defter-i müfredât eşyâ-i ma‘lûmesini işbu mütevellî-i mezbûr Mehmed Beşe’ye rehin vaz‘ ve teslîm eyledikde mütevellî-i merkūm dahi ber-vech-i muharrer yedinden ahz u kabz eylediğinden sonra deyn-i mezkûru târih-i merkūmdan bir sene tamamına değin mütevellî-i mezbûra edâ edemez ise rihân-ı mezkûreyi semen-i misli ile âhara bey‘ ve kabz-ı semen ve semen-i mezkûrdan deyn-i mezbûru mütevellî-i mezbûra edâ ve fazla kalırsa kendiye îsâle ve bunlar mütevakkıf olduğu umûrun küllîsine azl ve in‘izâlden masûne vekâlet-i devriye ile tarafından işbu mezbûr İbrahim’i vekîli ve nâib-i menâb nasb ve ta‘yîn eyledikde ol dahi ber-minvâl-i muharrer vekâlet-i merkūmeyi kabûl eyledi bizler bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’l-hâmis aşer min-Şa‘bân li-sene selâse ve erba‘în ve mi’e ve elf. Şuhûdü’l-hâl: Ahmed Odabaşı b. Hüseyin, İbrahim Odabaşı b. Abdullah, Ahmed Odabaşı b. Süleyman, İsmail Beşe b. Selim, Mehmed Çelebi b. Abdullah bölükbaşı, İbrahim Çelebi b. Mustafa du‘âcı, Ya‘kub b. Abdullah el-muhzır, Abdullah Çelebi kerpicî.