Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 145 Hüküm no: 48 Orijinal metin no: [5a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Marko’nun, nikâhlandığı Ezmerağda’yı sahiplenen Todori’ye açtığı davada haklı olduğu Ma‘rûz Medîne-i Üsküdar’a tâbi‘ Kandilli karyesinde mütemekkin arzuhâlde mezkûr Nikola v. Marko nâm zimmî medîne-i mezbûrede mahfil-i bâbda meclis-i şer‘-i hatîrde arzuhâl eden Todori v. Mihal nâm zimmî muvâcehesinde hâzır bi’l-meclis Ezmerağda bt. Anton nâm Nasrâniye dört aydan beri bana nâmzed olmağla işbu târih-i i‘lâm şehrinin dördüncü günü medîne-i Ebâ Eyyûb el-Ensârî mahkemesinde yüz guruş mehr-i müeccel tesmiyesiyle şühûd mahzarında nefsini bana tezvîc eyledikde ben dahi tezevvüc ve kabûl etmiş iken merkūm Todori benim zevce-i menkûhamdır deyü beni iz[di]vâc mu‘âmelesinden men‘ ve müdâhale etmekle suâl olunup müdâhalesi men‘ olunmak matlûbumdur deyü da‘vâ ve merkūm Todori zimmî cevâbında fi’l-hakīka müdde‘î-i merkūm Nikola zimmî mersûme Ezmerağda Nasrâniyeyi tezevvüce tâlib olup ol dahi imtinâ‘ etmekle merkūme Ezmerağda Nasrâniye bana hitâb edip müdde‘î-i merkūm için beni halâs eyle dediğine binâen ben dahi tarafından gāibetü ani’l-meclis Marya Nasrâniyeyi fuzûlî vekîl ve iki şâhid tedârik ve Tophâne’de yüz guruş mehr ile kendime akd ettirdim deyü akd-i mezkûrda ve vekâletde merkūme Ezmerağda Nasrâniyenin haberi olmayıp fuzûlî olduğunu merkūm Todori zimmî ikrâr ve i‘tirâf edip husûs-ı mezkûrda merkūm Todori zimmînin bilâ-vekâlet akd-i nikâh da‘vâsı meşrû‘a olmayıp müdde‘î-i merkūm Nikola zimmînin takrîri üzere akd-i nikâhı merkūme Ezmerağda Nasrâniye tasdîk edip merkūmenin tasdîkıyla akd sahîh olmağla merkūm Todori zimmî bî-vech mu‘ârazadan men‘ olunduğu izzetlü bostancıbaşı ağa tarafından mübâşir ta‘yîn olunan Çukadâr el-Hâc Hasan’ın iltimâsıyla huzûr-ı âlîlerine i‘lâm olundu. Fî 7 min-C sene 1204