Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 145 Hüküm no: 49 Orijinal metin no: [5a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Mehmed’in, kocasında kalan eşyaların verilmesi talebiyle açtığı davada kocasının eşyaları vermeyi, Rukiye’nin de avizeyi iade etmeyi kabul ettikleri Ma‘rûz Mahmiye-i İslâmbol’da Kumkapısı’nda sâkine Rukiye bt. Mehmed tarafından vekîl olduğu es-Seyyid Mustafa b. Hasan ve Memiş b. Mustafa nâm kimesneler şehâdetleriyle sâbit olan vâlidesi zâtı mu‘arrefe Emine bt. Salih nâm hatun medîne-i Üsküdar’da mahfil-i bâbda meclis-i şer‘-i hatîrde müvekkile-i mezbûrenin zevc-i dâhili Ahmed Efendi b. Mehmed Emin Efendi mahzarında kızım müvekkile-i mezbûrenin eşyâ-i memlûkesinden bir beledî döşek ve bir basma şilte ve bir baş yasdığı ve bir yüz yasdığı ve bir döşek çârşebi ve bir şilte yüzü ve üç entari ve bir çiçekli hırka ve bir şalî cebe ve bir sandal kuşak ve üç boğça ve bir peşkir ve bir işleme havlu ve bir sâde havlu ve bir silecek ve on iki değirmi mücessem yemeni ve altı fağfûr fincan ve bir sîm zarf ve bir şamdan ve bir tepsi ve üç billûr kâse ve bir sîm uçkurluk ve üç kaşık ve üç gömlek ve üç don ve bir çekmece ve bir sandık ve bir kutu ma‘a ipek ve bir çuka seccâde ve iki âyine ve bir Mısır çârşebi zevci mezbûr Ahmed Efendi ile ma‘an sâkine olduğu menzilinde kalmağla suâl olunup teslîme tenbîh olunmak bi’l-vekâle matlûbumdur deyü da‘vâ ve mezbûr Ahmed cevâbında fi’l-hakīka eşyâ-i mezkûre menzilinde olduğunu ikrâr ve târih-i kitâbdan on gün tamamında teslîme ta‘ahhüd eyledikde vekîl-i mezbûre dahi kızı müvekkile-i mezbûreden zevci mezbûr Ahmed Efendi’nin bi-tarîki’l-âriye matlûbu olan bir elmas avizeyi mezbûr Ahmed Efendi’ye teslîme ta‘ahhüd ve bu vechile beynleri ıslâh olunduğu bi’l-iltimâs [huzûr-ı âlîlerine i‘lâm olundu]. Fî 29 min-Ca sene 1204