Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 146 Hüküm no: 50 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstefan v. Dano’nun Peyka v. Dimitri’de alacağı olduğu iddiasıyla açtığı davada, İstefan’ın mahkemeden firar ettiği Ma‘rûz Mevâdd-ı şer‘iye istimâ‘ı’çün kıbel-i şer‘-i şerîfden meb‘ûs Abdullah Efendi dâ‘îleri medîne-i Üsküdar’a tâbi‘ Çenger karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf ettikde Mahrûse-i Galata’ya muzâfe Beşiktaş kasabasına tâbi‘ Ortaköy’de mütemekkin İstefan v. Dano nâm zimmî meclis-i ma‘kūd-ı mezkûrda Peyka v. [Di]mitri nâm zimmî muvâcehesinde merkūm Peyka zimmî târih-i i‘lâmdan bir buçuk sene mukaddem yedimden istikrâz ve kabz ve umûruna sarfla istihlâk eylediği yirmi guruş hakkımı taleb ederim deyü da‘vâ merkūm Peyka zimmî cevâbında müdde‘î-i merkūm yedinden yirmi guruş ahzını ikrâr lâkin müdde‘î-i merkūmun gāib ani’l-beled Hıristo zimmîye cihet-i deyn-i şer‘îden yirmi guruş deyni olup gāib-i merkūm dahi beni vekîl etmekle meblağ-ı merkūm yirmi guruşu deyn-i mezkûr için vermiş idi deyü eylediği def‘ini isbât için ihzâr eylediği şâhidleri edâ-yı şehâdet esnâsında müdde‘î-i merkūm İstefan zimmî gaybet eylediği ba‘de’l-inhâ bi’l-iltimâs huzûr-ı âlîlerine i‘lâm olundu. Fî 7 min-C sene 1204